Tags-Subah

ḳhanda-e-sub.h-e-azal tīrgī-e-shām-e-abad
donoñ aalam haiñ chhalakte hue paimānoñ meñ

zālim idhar kī sudh le juuñ sham-e-sub.h-gāhī
ek aadh dam kā āshiq mehmān ho rahā hai

kaun sī baat na.ī ai dil-e-nākām huī
shaam se sub.h huī sub.h se phir shaam huī

husn se lījiye tanzīm-e-do-ālam kā sabaq
sub.h hotī hai to gesū bhī sañvar jaate haiñ

kaT jā.egā ye karb-e-shab-e-ġham bhī ai 'zahīr'
shub.h-e-nashāt-o-fasl-e-nigārāñ bhī aa.egī

baḌhne lagī yaqīn o gumāñ meñ jo kashmakash
va.ada bhī sub.h o shaam pe Taltā chalā gayā

phūTne vaalī hai mazdūr ke māthe se kiran
surḳh parcham ufuq-e-sub.h pe lahrāte haiñ

shab-e-va.ada fasīl-e-hijr se aage chamaktā hai tirā ism-e-sitāra-jū
ki jaise koī paivand-e-ridā-e-sub.h aa jaa.e kisī qindīl kī zad meñ

aah koī na kar sakā chāra-e-talḳhī-e-firāq
nāla-e-sub.h ke baġhair giriya-e-shām ke sivā

yā sub.h ho chuke kahīñ yā maiñ hī mar chukūñ
ro baiThūñ is sahar hī ko maiñ yā sahar mujhe

sub.h-e-bahār ham ko bulātī rahī magar
ham khelte rahe kisī zulfoñ kī shaam se

ye maanā sub.h-e-sādiq ko kare vo jhuuT se tauba
usī pal vo magar bād-e-sabā se jhuuT bolegī

ai 'qalaq' kyā huā buḌhāpe meñ
ishq kuchh sair-e-subah-gāh nahīñ

jaise ġhunche khil uThte haiñ tar ho kar ashk-e-shabnam se
dil shab-bhar hijr meñ ro ro kar har sub.h yūñhī masrūr bhī hai

ham ahl-e-qafas tanhā bhī nahīñ har roz nasīm-e-sub.h-e-vatan
yādoñ se mo.attar aatī hai ashkoñ se munavvar jaatī hai

ham rah-ravān-e-rāh-e-fanā der rah chuke
vaqfa bisān-e-sub.h koī dam bahut hai yaañ

shāyad ki kaam sub.h tak apnā khiñche na 'mīr'
ahvāl aaj shaam se darham bahut hai yaañ

sub.h se shaam huī rūThā huā baiThā huuñ
koī aisā nahīñ aa kar jo manā le mujh ko

shab ġhanīmat thī ki ye zaḳhm-e-nazāra to na thā
Das ga.e sub.h-e-tamannā ke ujāle mujh ko