Tags-Subah

hayā kī ik hasīñ chādar agar taanī nahīñ hotī
tumhārī sub.h raushan raat nūrānī nahīñ hotī

shīrīñ-adā.iyāñ bhī hoñ raftār-e-nāz bhī
kāfūr-e-sub.h-e-hashr ho qand-o-nabāt meñ

raat ke lamhāt ḳhūnī dāstāñ likhte rahe
sub.h ke aḳhbār meñ hālāt behtar ho ga.e

bad-nasībī ho to har ḳhuub kī ḳhūbī hai fuzūl
sub.h kā vaqt sitāroñ ko burā hotā hai

raat ke ghar meñ baḌā kohrām thā
sub.h kī ab be-zabānī aur hai

ye laal Dibiyā meñ jo paḌī hai vo muñh dikhā.ī paḌī rahegī
jo maiñ bhī rūThā to sub.h tak tū sajī sajā.ī paḌī rahegī

bhīgā bhīgā sub.h kā āñchal
raat bahut paanī barsā hai

hai ārmīdagī meñ nikohish bajā mujhe
sub.h-e-vatan hai ḳhanda-e-dandāñ-numā mujhe

dahkā thā chaman aur dam-e-sub.h kisī ne
ik aur hī mafhūm gul-e-tar se nikālā

vo sub.h hogī to fir.aun phir na guzreñge
diloñ ko rauñdte insān ko masalte hue

nigār-e-sub.h kī ummīd meñ pighalte hue
charāġh ḳhud ko nahīñ dekhtā hai jalte hue

sub.h safar aur shaam safar
hastī kā anjām safar

sub.h hote hī mujhe ashkoñ se muñh dhonā hai
mujh se āñkheñ na churā dīda-e-pur-nam shab-e-vasl

sub.h niklā kisī dulhan kī damak ruḳh pe liye
shaam Duubā kisī beva sā bujhāyā sūraj

chale chalo ki abhī sub.h kī siyāhī hai
sahar qarīb hai taara koī huā na huā

chalā jo shab kā musāfir to is adā se chalā
ki jab rukā to dar-e-sub.h rūnumā na huā

dam sard hī vo bhar kar ye mujh se lagā kahne
har sub.h gulistāñ kī hālat yahī hotī hai

'ishq' apnī fanā kā ḳhauf sarkash ke nahīñ dil meñ
kab sham.a ye hai raushan jo sub.h bhī hotī hai

kise bulā.eñ chanāroñ meñ aadhī raat ga.e
agar kareñ to kise sub.h kā salām kareñ

ye kis sub.h-e-haqīqat meñ khulī hai aañkh merī
ki tere ḳhvāb bhī ab saath chhoḌe jā rahe haiñ