Tags-Sukoon

sukūn-e-dil na mayassar huā zamāne meñ
na yaad rakhne meñ tum ko na bhuul jaane meñ

aa ki vaqt-e-sukūn-e-marg aayā
naala nā-ḳhush-gavār thā na rahā

rāteñ mujh meñ sukūn kitnā hai
ham ne dekhā ye bandagī kar ke

jo dekho ġhaur se kuchh kam nahīñ hai ye bhī 'tūr'
ik iztirār sukūn-e-havā meñ rakkhā hai

ābād kar ḳharābae--zehn-o-ḳhayāl ko
shahroñ meñ DhūñDhtā hai sukūn-o-qarār kyā

mil jaa.e be-qarār ko lutf-e-sukūn-e-dil
aisī to bas misāl ḳhudā hī ke ghar meñ hai

thī har taḌap sukūn kī duniyā liye hue
pahlū meñ aap the ki dil-e-nā-subūr thā

bechain zindagī ke taqāze ajiib haiñ
phir us jagah chaleñ jahāñ kho aa.e haiñ sukūn

ābādiyoñ meñ kho gayā sahrāoñ kā junūn
shahroñ kā jamghaToñ meñ gayā gaañv kā sukūn

hai ab to ek jaal sukūn-e-hameshgī
parvāz kā to zikr hī kyā par bhī kuchh nahīñ

yaqīn kaise karūñ maiñ 'bāno'
sukūn kyā de sakeñ dilāse

ye sukūn-e-jāñ kī ghaḌī Dhale to charāġh-e-dil hī na bujh chale
vo balā se ho ġham-e-ishq yā ġham-e-rozgār koī to ho

hai jis ke haath meñ ye bāg-Dor aalam kī
bahut sukūn se us kī amaañ meñ rahtī huuñ

sukūn luTtā rahegā fazā hī aisī hai
tumhāre shahr kī āb-o-havā hī aisī hai

sukūn miltā hai jaltī huī dopahroñ meñ
banī haiñ marham-e-dil dhuup kī shuā.eñ bhī

sukūn-e-qalb to kiyā hai qarār-e-jāñ bhī luTā
tumhārī yaad bhī aa.ī to rāhzan kī tarah

ġhazab huā ki muqaddar mujhe vahāñ laayā
jahāñ sukūn bhī nāpaid lutf bhī mafqūd

kahāñ se lā.eñge sabr-o-sukūn ke lamhe
ki mere ghar meñ hai kohrām taultī huī raat

ġhazal kahne kā mausam 'qāsmī' ab ho gayā ruḳhsat
sukūn-e-qalb to us kī sanā-ḳhvānī meñ rakkhā hai

girūñ zamīn pe maiñ TuuT kar sitārā sā
magar sukūn kī ḳhvāhish paroñ se duur rahe