Tags-Sukoon

hai ain vasl meñ bhī pur-ḳharosh-e-parvāna
sukūn-e-qalb ba-āġhosh-e-yār bhī to nahīñ

shauq-o-armāñ kī be-qarārī ko
jis nazar se sukūn hotā hai

ik ghar banā ke kitne jhameloñ meñ phañs ga.e
kitnā sukūn be-sar-o-sāmāniyoñ meñ thā

yahī zindagī hai burī-bhalī ye kashīda sar ye barahna-pā
na ġhubār-e-rāh se muzmahil na sukūn-e-jāñ kā i.aada hai

uTho dard kī justujū kar ke dekheñ
talāsh-e-sukūn-e-tabī.at kahāñ tak

kahne ko pur-sukūn magar maḳhmase meñ huuñ
barsoñ se maiñ ḳhudāyā ajab marhale meñ huuñ

ab to sukūn baḳhsh ki 'at.har-shakīl' ne
is umr-e-muḳhtasar meñ bahut dukh sahe ḳhudā

sukūn-e-qalb ke asbāb ham pe band rahe
magar ham ahl-e-mohabbat vafā-pasand rahe

sukūn-e-dil fanā hai aur maiñ huuñ
ġhamoñ kā qāfila hai aur maiñ huuñ

kabhī to ham haiñ yahāñ vahāñ ke kabhī tasavvur idhar udhar kā
sukūn-o-rāhat se kyā ta.alluq ki bad-gumānī hai aur ham haiñ

ye kaun de gayā mujh ko sukūn-e-qalb-o-nazar
ye kis kā naam liyā thā abhī abhī maiñ ne

na ab sukūn mile nā ise qarār kahīñ
na ab ḳhamosh hai dil aur na arz-e-hāl meñ hai

vo dushman-e-sukūn-e-dil-o-jāñ yahī na ho
ma.asūm sī nigāh ki jis par gumāñ nahīñ

tahrīk-e-iztirāb-e-musalsal to dekhiye
dam bhar sukūn-e-qalb kā sāmāñ nahīñ huā

ban ga.ī mere liye ik iztirāb-e-mustaqil
jis mohabbat ko sukūn-e-qalb-o-jāñ samjhā thā maiñ

nā-murādī ke ba.ad be-talabī
ab hai aisā sukūn jiine meñ

zamīñ kī god meñ itnā sukūn thā 'anjum'
ki jo gayā vo safar kī thakān bhuul gayā

kabhī kabhī tū mujhe yaad kar to letī hai
sukūn itnā sā kaafī hai zindagī ke liye

unheñ maut degī ye dard kyā
hai sukūn jin ko azaab meñ

kahīñ to dil ko milegā sukūn-e-ahl-e-junūñ
chalo jahāñ bhī dil-e-be-qarār le ke chale