Tags-Sukoon

kar na sukūn-e-dil kā ġham hādi-e-mubtalā zarā
ishq kī bārgāh meñ dard kī kuchh kamī nahīñ

sukūn-e-qalb mayassar kise jahān meñ hai
tirī zamīñ meñ kahāñ vo jo āsmān meñ hai

baat ye hai ki sukūn-e-dil-e-vahshī kā maqām
kunj-e-zindāñ bhī nahīñ vus.at-e-sahrā bhī nahīñ

hai vaj.h-e-sukūn-e-dil-e-āshufta-navā bhī
vo aañkh ki hai fitna-e-sad-hūsh-rubā bhī

kaḌak kar bijliyāñ rah jā.eñgī chhaT jā.eñge bādal
rahegā zindagī ban kar sukūn-e-āshiyāñ merī

jāgeñ to ās-pās kinārā dikhā.ī de
dariyā ho pur-sukūn khulā bādbāñ bhī ho

us din mirā ye dil to bahut hī udaas thā
shāyad sukūn hī ke liye dar-ba-dar gayā

ye kaun zehn meñ chupke se roz aa ke 'niyāz'
sukūn-e-qalb-o-nazar pā.emāl kartā hai

agar kisī ne badan kā sukūn paayā hai
vo shaḳhs ruuh kī tārīkiyoñ meñ uljhā hai

yahī aadat to hai 'sādī' sukūn-e-qalb kā baa.is
maiñ nafrat bhuul jaatā huuñ mohabbat baañT detā huuñ

jo Dūbnā hai to itne sukūn se Duubo
ki ās-pās kī lahroñ ko bhī patā na lage

tumhī nahīñ the samundar ke pāniyoñ kī tarah
kabhī sukūn kabhī iztirāb thā maiñ bhī

'najmī' ye ḳhamoshī bhī merī kuchh vaj.h-e-sukūn-e-dil na huī
maiñ zabt-e-fuġhāñ se dard ko apne aur baḌhātā jaatā huuñ

tire jaisā merā bhī haal thā na sukūn thā na qarār thā
yahī umr thī mire ham-nashīñ ki kisī se mujh ko bhī pyaar thā

sukūn-e-rūh miltā hai zamāne ko tire dar se
bahisht-o-ḳhuld ke mānind ham ne terā dar jaanā

sukūn-e-dil to jahāñ meñ kahīñ nahīñ ai 'josh'
phir is sukūñ ke liye iztirāb kyā ma.anī

taras rahā hai zamāna sukūn-e-dil ke liye
sukūn-e-dil na mayassar huā to kyā hogā

chāhiye kuchh sukūn duniyā meñ
ḳhvāhisheñ apnī muḳhtasar kar leñ

baḌā sukūn hameñ ghar meñ aa ke miltā hai
ham apne bachchoñ ke jab sar ko chuum lete haiñ

itnā sukūn to ġham-e-pinhāñ meñ aa gayā
āġhosh-e-dil se dāman-e-mizhgāñ meñ aa gayā