Tags-Sukoon

sukūn-e-maut mirī laash ko nasīb nahīñ
rahe magar koī itnā na be-qarār rahe

sukūn-e-qalb kisī ko nahīñ mayassar aaj
shikast-e-ḳhvāb hai har shaḳhs kā muqaddar aaj

use sukūn hai is se ki ham ko chain nahīñ
bas ik junūn hamārī ḳhabar meñ rahtā hai

dimāġh-o-zehn meñ ik jañg barpā hai ḳhayāloñ kī
ise hamvār kar ke ik sukūn-e-jāvedāñ de de

jitnā sakūñ milā hai tire saath raah meñ
itnā sukūn to mujhe ghar ne nahīñ diyā

utar to sakte ho yaar lekin ma.aal par bhī nigāh kar lo
ḳhudā-nā-karda sukūn-e-sāhil na raas aayā to kyā karoge

sab apne apne ghar meñ nazar-band ho ga.e
ab shahr pur-sukūn hai mash.hūr ho gayā

baiThī huuñ intizār meñ taktī huuñ rah tirī
rāhat sukūn-o-chain na mujh ko qarār hai

dil ko is se sukūn miltā hai
dard kī mahfileñ sajāne de

dil ko sukūn baḳhsh de ai ḳhāliq-e-jahāñ
tañg aa gayā hai ab ye jahān-e-zalīl se

baḌe sukūn se zulfeñ sañvārne vaale
kisī kī ziist na ban jaa.e mustaqil uljhan

sukūn-o-zabt kī to ham-nashīñ maiñ intihā kar duuñ
magar mujh ko vo yūsuf ab mayassar ho nahīñ saktā

maiñ jab sukūn kī manzil se chand gaam pe huuñ
sadā.eñ detā hai maazī mirā musalsal kyuuñ

dhuup meñ aa.e to sukūn milā
chhāñv meñ the to dāġhdār the ham

sukūn-e-dil baḌī daulat sahī ai ham-nashīñ lekin
sukūñ pā kar bhī akasr muztarib rahnā paḌā mujh ko

ye maut hai yā koī āḳhirī visāl ke ba.ad
ajab sukūn meñ soyā huā sā lagtā hai

sukūn kyuuñ nahīñ karte thake hue manzar
tumhārī aañkh meñ bistar agar banā huā hai

zamīñ sukūn kī hālat meñ aa.egī lekin
use 'nadīm' kī she.arī kitāb detā chal

dil ko sukūn kar atā jaan ko baḳhsh de qarār
tere karam kī der hai dard ye lā-davā nahīñ

raat kī niiñd uḌ ga.ī din kā sukūn luT gayā
terī nigāh-e-nāz ne kar diyā dil pe kyā asar