Tags-Sukoon

sun ai nigāh-e-mohabbat se rūThne vaale
tire ḳhayāl meñ gum hai sukūn-e-dil merā

sukūn-e-shauq ho yā iztirāb-e-shauq 'ravish'
agar ba-manzila-e-jāñ nahīñ to kuchh bhī nahīñ

jo ahd-e-rafta se jā.ūñgā raftagāñ kī taraf
to phir sukūn se vahshat badal ke rakh dūñgā

paayā sukūn ham ne thā bāñhoñ meñ aap kī
phir se nasīb hogā vo kyā aap ḳhush raheñ

aur to kuchh bhī nahīñ lekin sukūn-e-qalb ko
maañ ke pahlū kī tarah kā ik bichhaunā chāhiye

sukūn-e-dil bhī ajab chiiz hai ki us ke tufail
jabīñ pe nuur hai hāl-e-tabāh meñ ai dost

use be-numū kisī ḳhvāb ne kahīñ gahrī niiñd sulā diyā
use bhā ga.ī haiñ kahāvateñ use bhī qafas meñ sukūn hai

sub.h-o-shām be-ma.anī
be-sukūn-e-be-ummīd

yās-ḳhez sub.hoñ se
be-sukūn shāmoñ se

ek pal bhī kahāñ sukūn milā
aap ko jab se jaan kar baiThe

samajh liyā thā kabhī ik sarāb ko dariyā
par ik sukūn thā ham ko fareb khāne meñ

'āmir' ab intishār kī parchhā.iyāñ tamām
thā lamha-e-sukūn makānāt par kabhī

tū āftāb hai maiñ gul duā tire sukūn kī
kisī kī shaan qahr hai kisī kī shaan aarzū

maiñ jis sukūn se baiThā huuñ is kināre par
sukūñ se lagtā hai merā qayām āḳhirī hai

jin ko hāsil thā zamāne meñ sukūn-e-iztirāb
apne hī ehsās ke sho.aloñ meñ jal kar rah ga.e

baḌe sukūn se Duube the Dūbne vaale
jo sāhiloñ pe khaḌe the bahut pukāre bhī

ye maqām-e-ishq hai kaun sā ye haiñ kaisī sabr kī manzileñ
na taḌap hai dil meñ na dard hai na sukūn hai na qarār hai

un āñganoñ meñ kitnā sukūn o surūr thā
ārā.ish-e-nazar tirī parvā kiye baġhair

sukūn chāhtā huuñ maiñ sukūn chāhtā huuñ
khulī fazā meñ nahīñ to qafas meñ de de tū

sukūn-e-dil ho magar tum bachā sake na mujhe
dalīl-e-dard-e-jigar tum bachā sake na mujhe