Tags-Taghaful

jatāve ulfat chaḌhāve abrū idhar lagāvaT udhar taġhāful
kare tabassum jhiḌak de har dam ravish haTīlī chalan daġhā kā

raah dushvār thī aur is ke taġhāful kā yaqīñ
shukr-e-altāf ki ye ma.arka sar kar aayā

ham ne maanā ki taġhāful na karoge lekin
ḳhaak ho jā.eñge ham tum ko ḳhabar hote tak

maiñ jī rahā huuñ to jiine kā hausla dekho
ye zaḳhm-koshī taġhāful-shi.ār hotī hai

ham tirī raah meñ juuñ naqsh-e-qadam baiThe haiñ
tū taġhāful kiye ai yaar chalā jaatā hai

taġhāful ne tere ye kuchh din dikhā.e
idhar tū ne lekin na dekhā na dekhā

adab-āmoz balā kā hai taġhāful un kā
shauq-e-pur-hauslā ne ḳhuub sazā paa.ī hai

pighal rahī hai taġhāful kī barf ab shāyad
ki muskurā ke mujhe yaar bevafā to kahā

vo tirā tarz-e-taġhāful ye tirā begāna-pan
vo alag dekhā huā hai ye judā dekhā huā

mujhe nigāh-e-taġhāful raqīb par altāf
adā-e-maslahat-āmez ne ġhulām kiyā

hai vahāñ shān-e-taġhāful ko jafā se bhī gurez
iltifāt-e-nigah-e-yār kahāñ se lā.ūñ

kahūñ kyā na dekheñ jo merī taraf
taġhāful sharīk-e-hayā ho gayā

'vahshat' us but ne taġhāful jab kiyā apnā shi.ār
kaam ḳhāmoshī se maiñ ne bhī liyā fariyād kā

us taġhāful-shi.ār se 'hasrat'
ham meñ tāqat nahīñ judā.ī kī

agar un ke taġhāful ko hai da.avā apnī tamkīñ kā
hamārī ḳhud-farāmoshī ko hai naaz apne nisyāñ par

īsār-o-muravvat haiñ jo tum dekh rahe ho
be-dād-o-taġhāful haiñ jo ham dekh rahe haiñ

shamīm-e-zulf mushk-e-afshāñ taġhāful sau sitam-sāmāñ
ġhurūr aur nāz-e-be-pāyāñ mizāj aur tab.a nāzuk-tar

vo be-ruḳhī ki taġhāful kī intihā kahiye
ba-īñ-hama use kis dil se be-vafā kahiye