Tags-Taghaful

vo taġhāful-shi.ār kyā jaane
ishq to husn kī zarūrat hai

dil mirā hai tire taġhāful siiñ
andalīb-e-gul-e-bahār ġhazab

kisī ne husn-e-taġhāful se jaañ talab kar lī
kisī ne lutf ke dariyā bahā ke maar diyā

mujhe gila to nahīñ aap ke taġhāful se
magar huzūr ne himmat baḌhā ke maar diyā

āshiq kī be-dilī kā taġhāful nahīñ javāb
us kā bas ek josh-e-mohabbat javāb hai

nāzāñ hai koī apne taġhāful pe marhabā
majbūr ho rahe dil-e-nāz-dāñ se ham

kyā husn ke andāz-e-taġhāful kī shikāyat
paimān-e-vafā ishq kā jab aur hī kuchh hai

tirī nigāh-e-taġhāful ko kaun samjhā.e
ki apne dil pe mujhe iḳhtiyār bhī to nahīñ

tum vo nāzuk ki ḳhamoshī ko fuġhāñ kahte ho
ham vo aajiz ki taġhāful bhī sitam hai ham ko

jaan kar kiije taġhāful ki kuchh ummīd bhī ho
ye nigāh-e-ġhalat-andāz to sam hai ham ko

apne se taġhāful hai ki be-rāh-ravī hai
kyā soch ke duniyā ke talabgār hue ho

tirī adā-e-taġhāful kī jaan se zālim
vo ik adā tirī jis par tujhe bhī naaz nahīñ

khol dil kī girah zarā tū bhī
ye taġhāful to bas bahāna hai

dil gavārā nahīñ kartā hai shikast-e-ummīd
har taġhāful pe navāzish kā gumāñ hotā hai

shahr meñ jo nazar paḌā us kā
kushta-e-nāz yā taġhāful thā

jān-levā hai 'muzaffar' ye taġhāful un kā
tīrgī-e-shab-e-hijrāñ nahīñ jiine detī

gilā nahīñ tujh se zindagī ke vo zāviye hī badal chuke haiñ
mirī vafā vo tire taġhāful kī nauha-ḳhvāñ thak ke so ga.ī hai

be-mahrī-o-be-gāñgī-o-jor-o-taġhāful
ham aisī mohabbat ke parastār nahīñ haiñ

taġhāful-mashrabī se nā-tamāmī bas-ki paidā hai
nigāh-e-nāz chashm-e-yār meñ zunnār-e-mīnā hai

husn ne itnā taġhāful merī hastī se kiyā
rafta rafta zindagī kā mujh pe ilzām aa gayā