Tags-Taghaful

na ho sakegā vo ramz-āshnā-e-kaif-e-hayāt
jo qalb chashm-e-taġhāful kā rāzdār na ho

kisī kī teġh-e-taġhāful kā maiñ vo kushta huuñ
na jaagā neze pe sau baar āftāb aayā

taġhāful sāzgār-e-shauq-e-ahl-e-dard kyā hogā
adā se do fareb aisā ki dil dīvāna ho jaa.e

kab talak chal pā.egī ye ek tarfa zyādtī
maiñ bhī jānūñ huuñ taġhāful jā kahe jā kyā karūñ

rakhte haiñ mohabbat ko taġhāful meñ chhupā kar
parvā hī to karte haiñ jo parvā nahīñ karte

'beḳhud' kī be-ḳhudī bhī hai tere ḳhayāl meñ
terī ḳhudī nahīñ ki taġhāful-shi.ār ho

payām aate rahe aksar kisī mahv-e-taġhāful ke
adā-e-bar-malā ban kar nigāh-e-sharmagīñ ban kar

taġhāful kā shikva karūñ un se kyūñkar
vo kah deñge tū be-muravvat nahīñ hai

merī numū hai tere taġhāful se vābasta
kam bārish bhī mujh ko kaafī ho saktī hai

ai taġhāful-kesh jaldī aa ki tū vāqif nahīñ
is dil-e-betāb o jān-e-muztarib ke Dhañg se

jism-o-jāñ pāmāl-e-sadmāt-e-taġhāful ho chuke
ab to jo hai māvarā-e-guftugū āñkhoñ meñ hai

dikhā.e ranj piirī ke ajal tere taġhāful ne
tujhe aanā thā pahle aah tū anjām kaar aa.ī

tez havā-e-taġhāful ho tum maiñ huuñ gard-o-ġhubār-e-mohabbat
ḳhuub mazā aa.egā mujh ko sāmne apne bikharne denā

is darja mohabbat meñ taġhāful nahīñ achchhā
ham bhī jo kabhī tum se gurezāñ hoñ to kyā ho

nazar-e-taġhāful-e-yār kā gila kis zabāñ siiñ bayāñ karūñ
ki sharāb-e-sad-qadah aarzū ḳhum-e-dil meñ thī so bharī rahī

maanā ki burā hai jo kam-āmez huuñ itnā
ye terā taġhāful bhī to achchhā nahīñ koī

kabhī tarz-e-taġhāful the yahī andāz-e-mahbūbī
jo ab sarf-e-navāzish-hā-e-pinhāñ hote jaate haiñ

munjamid koh-e-nidā par hai taġhāful se tire
hiddat-e-chashm-e-karam us pe luTā dī jaa.e