Tags-Taghaful

husn ke husn taġhāful se pareshān na ho
ġhaur se baat kahāñ koī hasīñ suntā hai

jis se vābasta rahā husn-e-taġhāful terā
tujh ko vo shaḳhs kabhī yaad to aayā hogā

sochiye ham se taġhāful bhī bajā hai ki nahīñ
ki yahī maqsad-e-arbāb-e-fanā hai ki nahīñ

idhar ye fardā ḳhafā hai mire taġhāful se
udhar ḳhulūs se maazī bulā rahā hai mujhe

dars-e-unvān-e-tamāshā ba-taġhāful ḳhush-tar
hai nigah rishta-e-shīrāza-e-mizhgāñ mujh se

ḳhush jo aa.e the pashemān ga.e
ai taġhāful tujhe pahchān ga.e

aisā TuuTā hai taġhāful pe kisī ke ye dil
ham se ro ro ke kahe ab na mohabbat karnā

kabhī sitam hai kabhī karam hai kabhī tavajjoh kabhī taġhāful
ye saaf zāhir hai mujh pe ab tak huā huuñ maiñ kāmyāb aadhā

taġhāful se chhuptī nahīñ hai mohabbat
taġhāful to aur āshkārā kare hai

kuchh to le kaam taġhāful se vafā ke paikar
ye tirā pyaar kahīñ maar na Daale mujh ko

vo taġhāful-shi.ār kyā jaane
ishq to husn kī zarūrat hai

tumhāre ahd-e-taġhāful meñ jī rahe haiñ abhī
huā hai kuchh tumheñ hāsil na ham hī mar ga.e haiñ

tire shi.ār-e-taġhāful pe zindagī qurbāñ
tire shi.ār-e-taġhāful meñ dilkashī kyuuñ hai

ġhalat-andāz sī nazreñ tabassum be-niyāzāna
taġhāful-keshiyoñ ko dāvat-e-armāñ bhī kahte haiñ

is iltifāt par koī dāman na thaam le
hai maslahat yahī ki taġhāful se kaam le

ba-ijz-ābād vahm-e-mudda.ā taslī-e-shoḳhī hai
taġhāful ko na kar masrūf-e-tamkīñ-āzmā.ī kā

hazāroñ karvaTeñ badlīñ zamāne ne lekin
uThe na ḳhvāb taġhāful se ḳhuftagān-e-hayāt