Tags-Taghaful

be-his ke taġhāful kā to shikva be-sūd
patthar se pighalne kā taqāzā be-sūd

vo jin ko tere taġhāful ne kar diyā mujrim
mirī nazar ko vahī log be-qusūr mile

nāz-o-niyāz āshnā taġhāful-e-e'tibār
haa.e kis ehtimām se tum ne mujhe miTā diyā

ġhaflat meñ terī kaam hamārā tamām hai
koī kah de itnā yār-e-taġhāful-shi.ār tak

phir koī tāza-sitam vo sitam-ījād kare
kaash is karb-e-taġhāful se ab āzād kare

gilā nahīñ tujh se zindagī ke vo nazariye hī badal ga.e haiñ
mirī vafā vo tire taġhāful kī nauha-ḳhvāñ thak ke so ga.ī hai

jaam ḳhālī the magar mai-ḳhāna to ābād thā
chashm-e-sāqī meñ taġhāful thā pashīmānī na thī

tire taġhāful se hai shikāyat na apne miTne kā koī ġham hai
ye sab ba-zāhir bajā hai lekin ye aañkh kyuuñ aaj merī nam hai

kuchh taġhāful hai to kuchh nāz-o-adā-kārī hai
qahr kā qahr hai dildārī kī dildārī hai

kashti-e-ālam ba-tūfān-e-taġhāful de ki haiñ
ālam-e-āb-e-gudāz-e-jauhar-e-afsāna ham

bedād-e-taġhāful se to baḌhtā nahīñ ġham aur
mere liye sīkho koī andāz-e-sitam aur

muntaḳhab maiñ hī huā mashq-e-taġhāful ke liye
vo taġhāful-kesh merī yaad se ġhāfil nahīñ

allāh allāh ye taġhāful aur is par ye ġhurūr
kyā mujhe nākām kar denā bhī koī kaam hai

ye koī nayā tarz-e-taġhāful to nahīñ hai
aisī to na thī dostī āġhyār se pahle

ik tarz-e-taġhāful hai so vo un ko mubārak
ik arz-e-tamannā hai so ham karte raheñge

ye naaz hai yā istiġhnā hai yā tarz-e-taġhāful hai yaaro
jo laakh koī taḌpe siske fariyād kare kuchh dhyān nahīñ

jo kuchh hai so hai us ke taġhāful kī shikāyat
qāsid se hai takrār na jhagḌā hai sabā se

de tirā husn-e-taġhāful jise hai chāhe fareb
varna tū aur jafāoñ pe pashīmāñ honā

na pūchho dosto maiñ kis tarah hañstā hañsātā huuñ
tavajjoh yaad rakhtā huuñ taġhāful bhuul jaatā huuñ

dekhne vaale taġhāful kār-farmā hai abhī
vo darīcha khul gayā husn-e-nazar khultā nahīñ