Tags-Taghaful

ġhanīmat hai chashm-e-taġhāful bhī un kī
bahut dekhte haiñ jo kam dekhte haiñ

maiñ ne maanā kaam hai naala dil-e-nāshād kā
hai taġhāful sheva āḳhir kis sitam-ījād kā

'vahshat' us but ne taġhāful jab kiyā apnā shi.ār
kaam ḳhāmoshī se maiñ ne bhī liyā fariyād kā

ze-hāl-e-miskīñ makun taġhāful durā.e naināñ banā.e batiyāñ
ki tāb-e-hijrāñ nadāram ai jaañ na lehū kaahe lagā.e chhatiyāñ

dil har ik haal se begāna huā jaatā hai
ab tavajjoh na taġhāful na adā māñge hai

nairañgī-e-dil hai ki taġhāful kā karishma
kyā baat hai jo terī tamannā nahīñ ham ko

hāsil us zikr-e-taġhāful se guzasht āñche guzasht
fā.eda fitna-e-ḳhufta ko jagānā shab-e-vasl

hai jis kā ek tabassum qarār-e-jāñ apnā
usī kā tarz-e-taġhāful rulā bhī detā hai

nikal bhī aayā huuñ us kūcha-e-taġhāful se
aur us ke dar pe bahut sā paḌā huā bhī huuñ maiñ

ik taġhāful se huā ishq kā dil ko ehsās
us kī ġhaflat kā natīja mirī hushyārī hai

asar-e-ishq taġhāful bhī hai bedād bhī hai
vahī taqsīr hai tāzīr badal jaatī hai

be-niyāzī hai taġhāful hai ki be-zārī hai
baat itnī to samajh lete haiñ dīvāne tak

ishq ke taġhāful se harzah-gard hai aalam
rū-e-shash-jihat-āfāq pusht-e-chashm-e-zindāñ hai

ham aise mahv-e-nazāra na the jo hosh aatā
magar tumhāre taġhāful ne hoshyār kiyā

soz-e-nazar se chhalkeñ naġhmāt-e-rāz-e-hastī
ai uqda-e-taġhāful rūdād-e-nāz ho jā

kabhī yak-ba-yak tavajjoh kabhī daf.atan taġhāful
mujhe aazmā rahā hai koī ruḳh badal badal kar

vo tabassum meñ nihāñ tanz ke mīThe nashtar
vo takallum meñ taġhāful ko chhupāne kī adā

aap ke taġhāful kā silsila purānā hai
us taraf nigāheñ haiñ is taraf nishāna hai

ham un ke taġhāful ko samajhte to haiñ lekin
duniyā bhī samajh le ye gavārā nahīñ karte

mere phūloñ se bhī dāman ko bachāyā tum ne
is taġhāful kī bhī kuchh tum ko ḳhabar hai ki nahīñ