Tags-Tasawwur

tirī nigah ke tasavvur meñ ham ne ai qātil
lagā lagā ke gale se chhurī ko pyaar kiyā

apnā haq maañg magar un ke ta.āvun se na maañg
jo tire haq kā tasavvur hī fanā kar Dāleñ

aahan kī salābat meñ ubhrā ma.asūm tasavvur narmī kā
phūloñ kī latāfat meñ umDā aahan ban jaane kā jazba

sunsān bayābānoñ meñ hai ik jazba-e-gulshan-ārā.ī
vīrāñ khañDaroñ meñ letā hai mahloñ kā tasavvur añgḌā.ī

muqaddar ko badal deñ vo zamāne ko ḳhafā kar deñ
magar apne tasavvur ko mirā ġham-ḳhvār rahne deñ

har ilm-o-yaqīñ se bālā-tar tū hai vo sipehr-e-tābinda
suufī kī jahāñ nīchī hai nazar shā.ir kā tasavvur sharminda

is qayāmat kī hai taarī zulmat-e-haul-āfrīñ
shab ke dil meñ sub.h kā goyā tasavvur tak nahīñ

ġhubār-e-rah-guzār-e-dahr meñ ālūdgī kab tak
mire zarrīñ tasavvur ko bisāt-e-kahkashāñ de de

hai tasavvur roz-o-shab kis kī tilā.ī rañg kā
chashm-e-nargis kī tarah zardār āñkheñ ho ga.iiñ

hai tasavvur bas-ki āñkhoñ meñ ḳhat-e-ruḳhsār kā
aa.ine kī tarah jauhar-dār āñkheñ ho ga.iiñ

hai tasavvur jo unhīñ kā to vo haiñ pesh-e-nigāh
ho ḳhayāl un ke sivā gar to hai rahzan un kā

diid un kī hai visāl un kā tasavvur un kā
jaan un kī hai jigar un kā hai tan-man un kā

kabhī to ham haiñ yahāñ vahāñ ke kabhī tasavvur idhar udhar kā
sukūn-o-rāhat se kyā ta.alluq ki bad-gumānī hai aur ham haiñ

phir tasavvur ne baḌhā dī nāla-e-mauzūñ kī lai
phir savād-e-fikr se ik sher paidā ho gayā

chalā hai chhoḌ ke tanhā kidhar tasavvur-e-yār
shab-e-firāq meñ thā tujh se mashġhala dil kā

terī furqat meñ tasavvur hai ye bedardī kā
ḳhvāb ham jānte haiñ niiñd ke aa jaane ko

merī mahdūd basārat kā natīja niklā
āsmāñ mere tasavvur se bhī halkā niklā

likhā tumhīñ ne mirī chashm-e-nam ko qulzum-e-ḳhvāb
tum hī ne us ke tasavvur ko bādbāñ likkhā

kaam kartā hai tasavvur kaam aatī hai nazar
be-sabab hotī nahīñ hai jalva-ārā.ī kī baat

ai tasavvur kyuuñ butoñ ko jamā kartā hai yahāñ
dil mirā ka.aba hai kuchh but-ḳhāna-e-āzar nahīñ