Tags-Travel

kar ke nagar nagar kā safar is zamīn par
logoñ kī būd-o-bāsh o rivāyat ko dekhtā

safar meñ tāza-dam hogā vo kaise
jo ghar hī se thakā-māñda gayā hai

ik safar haañ vo safar paañv kī zanjīr banā
ba.ad ai yaar tirī yaad meñ jaltā rahā dil

tai kiyā maiñ ne safar jaldī ki maiñ jaldī meñ thā
rah gayā saaya mirā donoñ jahāñ ke us taraf

safar meñ jab na tere kaam aa.e
zarā ye soch daulat kis liye hai

har safar se kashtiyoñ kā lauTnā mumkin nahīñ
kyā pata kab lahr koī dushman-e-jānī milī

maiñ qāfile se bichhaḌ kar bhalā kahāñ jā.ūñ
sajā.e baiThā huuñ zād-e-safar barā.e-faroḳht

vahī sitāra jo bujh gayā ham-safar thā merā
usī kī samt ek sabz sāhil pe ghar thā merā

zindagī dasht-e-safar dhuup hī dhuup
tere bin kaise kahāñ ke saa.e

hamesha ik masāfat ghūmtī rahtī hai paañv meñ
safar ke ba.ad bhī kuchh log ghar pahuñchā nahīñ karte

uḌaa.e phirtī hai an-dekhe sāhiloñ kī havā
maiñ ek umr se ik be-karāñ safar meñ huuñ

āḳhirī hai safar vo subuk-sar chale
us ke dāman se apne sitāre uThā

mujhe dasht-e-taḳhayyul kā safar karnā agar aatā
tavāf-e-ka.aba kartā, zindagī ko samt mil jaatī

gum dhuñdlakoñ meñ huī rāhguzar tere ba.ad
ruk gayā jaise sitāroñ kā safar tere ba.ad

maiñ añdheroñ kā musāfir huuñ ujāloñ kā naqīb
kis kī jur.at hai mirī gard-e-safar tak pahuñche

shikasta-dil añdherī shab akelā rāhbar kyuuñ ho
na ho jab ham-safar koī to apnā bhī safar kyuuñ ho

alag haiñ ham ki judā apnī rah-guzar meñ haiñ
vagarna log to saare isī safar meñ haiñ

tirī talab ne falak pe sab ke safar kā anjām likh diyā hai
kisī ko najm-e-sahar kisī ko sitāra-e-shām likh diyā hai

ham musāfir haiñ gard-e-safar haiñ magar ai shab-e-hijr ham koī bachche nahīñ
jo abhī āñ.suoñ meñ nahā kar ga.e aur abhī muskurāte palaT ā.eñge

jugnuoñ se saath chalne kī guzārish kījiye
hijr kā lambā safar hai raat hai tanhā.ī hai