Tags-Travel

kare kī minnateñ karte haiñ ek muddat se
magar nasīb meñ apne safar nahīñ khultā

safar kā bojh barābar rahā hai donoñ par
jahāñ jahāñ bhī thā paanī vahīñ vahīñ thī aag

ham jinheñ ham-safar-e-rāh-e-vafā jānte the
kyā batā.eñ ki vahī log hamāre na rahe

zindagī kā safar tai to karte rahe
raat kaTtī rahī din guzarte rahe

vo aadmī bhī jise jān-e-anjuman kahiye
chalā jab uTh ke to saare safar meñ tanhā thā

maiñ ye samjhā thā ham-safar hoñge
aah kitne muhīb saa.e haiñ

ai ḳhoshā azm-e-javāñ zauq-e-safar josh-e-talab
hādse baḌh na sake apne qadam se aage

ujaaḌ ban meñ utartā hai ek jugnū bhī
havā ke saath koī ham-safar bhī aatā hai

surañgoñ raah meñ har-gām huā jaatā hai
muzmahil ḳhū-e-safar dard pashemāñ kyuuñ hai

tere qābil bhī nahīñ tere muqābil bhī nahīñ
ham-safar saath mujhe apne magar jaane de

kaise safar par niklā huuñ
muḌ muḌ kar kyā taktā huuñ

na ho qamīz to paañv se peT Dhak leñge
ye log kitne munāsib haiñ is safar ke liye

abhī safar meñ koī moḌ hī nahīñ aayā
nikal gayā hai ye chup-chāp dāstān se kaun

khul nahīñ paayā mirī ruuh pe sahrā 'sājid'
ya.anī mahdūd huuñ maiñ sair-o-safar tak ab bhī

jaise har chehre kī āñkheñ sar ke pīchhe aa lagīñ
sab ke sab ulTe hī qadmoñ se safar karne lage

jab tak ba-dosh rahtā hai rahtā huuñ gāmzan
merā safar haqīqatan sāmān hī kā hai

ki jaise abr havā kī girah se khul jaa.e
safar kī shaam mirā mehrbāñ thakan meñ khulā

ḳhud aap se bichhḌā huuñ maiñ is andhe safar meñ
ai tīrgi-e-shab mire saa.e kā pata de

guzrī hai mirī umr sarāboñ ke safar meñ
ai reg-e-ravāñ ab kisī chashme kā pata de

kabhī din kī dhuup meñ jhuum ke kabhī shab ke phuul ko chuum ke
yuuñ hī saath saath chaleñ sadā kabhī ḳhatm apnā safar na ho