Tags-Visaal

is hijr o visāl ke biich kahīñ ik lamhe ko jī chāhtā hai
bas abr-o-havā ke saath phiro aur jism o jaañ se guzar jaao

vasl meñ kyā visāl mushkil thā
yaad par roz hijr kā na rahā

zarā visāl ke ba.ad aa.ina to dekh ai dost
tire jamāl kī doshīzgī nikhar aa.ī

shab-e-visāl baḌe lutf se kaTī ai 'hijr'
tamām raat kisī ke gale kā haar rahā

ik ye savāl hal nahīñ hotā visāl meñ
kitnā qarīb aa ga.e kitnā samajh liyā

dil se kahtā hai shab-e-vasl yahī shauq-e-visāl
maiñ vo armān nahīñ huuñ ki nikal jā.ūñgā

firāq-rut meñ bhī kuchh lazzateñ visāl kī haiñ
ḳhayāl hī meñ tire ḳhāl-o-ḳhad ubhārā kareñ

na vo jhāñknā hai galī galī na vo tāknā hai kalī kalī
na kasak hai hijr ke dard meñ na damak hai shauq-e-visāl meñ

mastī meñ un ko lag ga.ī lau aur ġhair kī
denī shab-e-visāl na thī is qadar sharāb

ye shab-e-safar bhī vabāl hai na firāq hai na visāl hai
isī shab ne niiñd harām kī isī shab ne ham ko sulā diyā

visāl-e-mahbūb kī tamannā kisī par iz.hār kī na aslan
qirān-e-sa.adain maiñ ne pūchhā jo koī aḳhtar-shumār aayā

hai jis ke saath juḌe ik hazār ik ḳhadshe
vo hijr kaisā hai 'hāmid' visāl kaisā hai

ye hijr-o-visāl jis meñ ham haiñ
ai lazzat-e-dard intihā hai

mai-e-farāġhat kā āḳhirī daur chal rahā thā
subū kināre visāl kā chāñd Dhal rahā thā

tire hijr tere visāl apne ḳhayāl meñ
kisī aa.ine meñ maiñ sab kā sab nahīñ aa sakā

ḳhvāb thā yā ḳhayāl thā kyā thā
hijr thā yā visāl thā kyā thā

visāl-e-yār kī ḳhvāhish meñ aksar
charāġh-e-shām se pahle jalā huuñ

kisī ne zamīñ ke jism se fasl-e-visāl chhīn lī
arsa-e-hashr sā bapā ruuh kī khetiyoñ meñ hai

visāl ho yā rahe jaddā.ī tumhārī ai jaan jaisī marzī
jo apnī hālat thī maiñ ne kah dī ab aage merī majāl kyā hai

nazar meñ zindagī kī phuul mo'atabar na ho sake
ḳhizāñ ko e'tirāz thā bahār se visāl par