Tags-Visaal

koī aisā kamāl ho jaa.e
hijr saarā visāl ho jaa.e

abhī visāl ke zaḳhmoñ se ḳhuun ristā hai
abhī ḳhafā hai mohabbat kā devtā mujh se

ye tazād-e-jān-o-jasad jise
tū visāl kah le firāq meñ

mausam badle phir bhī hai āshob-e-visāl-o-hijr vahī
haal zamāne kā jab ye ho kyā maazī kyā haal kareñ

vo baar baar merā lipaTnā shab-e-visāl
un kā jhijak ke kahnā koī dekhtā na ho

na rakhī dil meñ hamāre tama-e-ḳhām-e-visāl
rashk-e-aġhyār kā āzār salāmat bāshad

araq visāl meñ poñchhā hai gul se gāloñ ko
yahī hai vaj.h ki bū-e-gulāb haath meñ hai

'habīb' mashq-e-riyāzat se kho ke zañg-e-duī
maze visāl ke har dam firāq-e-yār meñ luuT

maiñ us se baat karūñ bhī to kis havāle se
ki musta.ār makāñ meñ kahāñ visāl-o-firāq

maiñ us ko haath lagātā bhī kis tarah 'sahbā'
ajiib kashmakash-e-jāñ azaañ visāl-o-firāq

shab-e-surūr na.ī dāstāñ visāl-o-firāq
na fikr-e-sūd-o-ziyāñ darmiyāñ visāl-o-firāq

havā-e-sub.h na jaane kahāñ kahāñ le jaa.e
shab-e-murād shab-e-darmiyāñ visāl-o-firāq

vo paḌh rahā thā baḌe ġhaur se lahū kī sarisht
har ek buuñd kā sirr-e-nihāñ visāl-o-firāq

vo kah gayā hai ki ā.ūñgā muntazir rahiyo
maiñ mubtalā-e-yaqīn-o-gumāñ visāl-o-firāq

usī ke naam pe jiite haiñ aur marte haiñ
yahī hai qissa-e-āshutagāñ visāl-o-firāq

allāh-re hamārā takalluf shab-e-visāl
roġhan ke badle itr jalāyā gulāb kā

maiñ sitāra na tum gulāb hue
mil rahe haiñ magar visāl kahāñ

hai kaun shai jis kī zid nahīñ hai jahāñ ḳhushī hai malāl bhī hai
ġham-e-judā.ī na khā tū ai dil firāq hai to visāl bhī hai

visāl-e-yār bhī hai daur meñ sharāb bhī hai
qamar bhī hai mire pahlū meñ āftāb bhī hai

phir us ke baad na dekhe visāl ke mausam
judā.iyoñ kī ghaḌī chashm-gīr aisī thī