Tags-Visaal

kabhī mujh se soz-e-hayāt le kabhī mujh se sāz-e-hayāt sun
maiñ fazā-e-qarya-e-hijr huuñ maiñ havā-e-shahr-e-visāl huuñ

be-muhābā mile hijr ho bā-visāl
koī dīvār raste meñ maa.il na ho

shab-e-visāl meñ ik nuqta-e-tavaqquf huuñ
aur ik junūñ hai use manziloñ ko paane kā

roz-e-siyāh hijr meñ mere jale charāġh
parvānoñ ko nasīb huā din visāl kā

na mile jab talak visāl us kā
tab talak faut hai mirā matlab

visāl-e-yār to mumkin nahīñ magar nāseh
ruḳh-e-hayāt isī aarzū se raushan hai

usī manzil meñ haiñ sab hijr-o-visāl
rah-rav-e-ābla-pā ġhaur se san

us but se jism-e-zār jo lipTā shab-e-visāl
aalam ko ehtimāl-e-rag-e-sañg ho gayā

yahī fasāna rahā hai junūñ ke sahrā meñ
kabhī firāq ke qisse kabhī visāl kī baat

tire ḳhayāl kā charchā tire ḳhayāl kī baat
shab-e-firāq meñ paiham rahī visāl kī baat

paiġhām-e-'fanā' laayā taskīn-e-dil-e-muztar
vo aa ga.e nazroñ meñ jab vaqt-e-visāl aayā

ye visāl o hijr kā mas.ala to mirī samajh meñ na aa sakā
kabhī koī mujh ko na pā sakā kabhī maiñ kisī ko na pā sakā

chalo ab duā karo nazmeñ paḌho visāl kī sab āyateñ paḌho
kyā rah gayā hai shaam kā ab raat se farāġh

surūr se aTe hue ai mausam-e-visāl ruk
mile darīda-qalb ko sukūn-e-indimāl ruk

guftugū kar rahī thī ḳhāmoshī
hijr kī raah meñ visāl sā thā

visāl-o-hijr kī sarhad pe jhuTpuTe meñ kahīñ
vo be-hijāb huā thā magar hijāb ke saath

tirā visāl alāmat hai mere jiine kī
aur ab ke jiine kī ummīd aur bhī kam hai

badal ke rakh diye hijr o visāl ke mafhūm
mujhe to us ne baḌī kashmakash meñ Daal diyā

kuchh to khiñchī khiñchī sī thī saa.at visāl kī
kuchh yuuñ bhī fāsle pe mujhe rakh diyā gayā

hijr o visāl kī sardī garmī sahtā hai
dil darvesh hai phir bhī raazī rahtā hai