Tags-Visaal

tūl-e-shab-e-firāq tirī ḳhair ho ki dil
āmāda-e-visāl tujhe dekh kar huā

maiñ bhī kab se chup baiThā huuñ vo bhī kab se chup baiThī hai
ye hai visāl kī rasm anokhī ye milne kī riit na.ī hai

hayā kā rañg jo aayā hai us ke chehre par
ye rañg hāsil-e-shām-e-visāl ho gayā hai

tirā vasl hai mujhe be-ḳhudī tirā hijr hai mujhe āgahī
tirā vasl mujh ko firāq hai tirā hijr mujh ko visāl hai

terā visāl ḳhair ab ik vāqi.a huā
ab apne-āp se bhī mile der ho ga.ī

maiñ tire hijr meñ jo zinda huuñ
sochtā huuñ visāl se aage

maiñ abhī talak visāl-e-āb-o-gil ke biich
jaise marg-e-be-maqām aur mirā vajūd

maiñ us kitāb ke kis baab ko paḌhūñ pahle
visāl jis kā hai mazmūñ firāq unvāñ hai

ḳhayāl-e-yār ko dījiye visāl-e-yār kā naam
shab-e-firāq ko gaisu-e-mushk-bū kahiye

rulā rulā diyā yāroñ ne aaj phir 'āqib'
ġham-e-firāq meñ zikr-e-visāl le aa.e

visāl hijr siyāsat masā.il-e-duniyā
ġhazal meñ ham bhī ye kyā kyā ḳhayāl le aa.e

unheñ zid hai arz-e-visāl se mujhe shauq-e-arz-e-visāl hai
vahī ab bhī un kā javāb hai vahī ab bhī merā savāl hai

mujhe apnī pastī kī sharm hai tirī rif.atoñ kā ḳhayāl hai
magar apne dil ko maiñ kyā karūñ use phir bhī shauq-e-visāl hai

tirī bazm-e-ḳhalvat-e-lā-makāñ tirā āstāñ mah-o-kahkashāñ
magar ai sitāra-e-ārzū mujhe ārzū-e-visāl hai

tirī yaad meñ huā jab se gum tire gum-shuda kā ye haal hai
ki na duur hai na qarīb hai na firāq hai na visāl hai

visāl-o-hijr se vābasta tohmateñ bhī ga.iiñ
vo fāsle bhī ga.e ab vo qurbateñ bhī ga.iiñ

paḌegī aah jo merī khuleñge band-e-qabā
shab-e-visāl karegī girah-kushā.ī choT

sunā hai ho bhī chukā hai firāq-e-zulmat-o-nūr
sunā hai ho bhī chukā hai visāl-e-manzil-o-gām

'dāġh' ab vasl kā visāl huā
yaar zinda ġham-e-judā.ī hai

ḳhauf-e-kam-mā.egī burā ho tirā
ārzū-e-visāl se bhī ga.e