Tags-Visaal

visāl-o-hijr kī hasrat meñ jū-e-kam-māya
kabhī kabhī kisī sahrā meñ jā nikaltī hai

bar-sar-e-hijrāñ bhī vābasta hai ummīd-e-visāl
ham sā shahr-e-ārzū meñ ḳhush-gumāñ koī to hai

sharāb piite hī vo khul ga.e vo khul khele
shab-e-visāl meñ kuchh lutf-e-intizār na thā

ab maiñ kahāñ visāl kā paudā lagā.uñgī
ye ghar to bhar gayā hai udāsī kī bel se

tujhe chāñd ban ke milā thā jo tire sāhiloñ pe khilā thā jo
vo thā ek dariyā visāl kā so utar gayā use bhuul jā

firāq meñ bhī udāsī baḌe kamāl kī thī
pas-e-visāl to is se sivā udāsī hai

shab-e-visāl bahut kam hai āsmāñ se kaho
ki joḌ de koī TukḌā shab-e-judā.ī kā

bas ek lams ki jal jaa.eñ sab ḳhas-o-ḳhāshāk
ise visāl bhī kahte haiñ ḳhush-bayānī meñ

visāl o hijr ki ek ik charāġh the donoñ
siyāh ho ke rahe shab ke be-karānī meñ

rafāqatoñ ke qarīne badalte rahte haiñ
so karb-e-hijr ko lutf-e-visāl hī samjho

kuchh aur ban paḌī na savāl-e-visāl par
hairat se dekh kar vo mire muñh ko rah ga.e

kaun māñge hai shabistān-e-visāl
bas ik āshufta-nazar yaad aayā

hikāyat-e-ishq se bhī dil kā ilaaj mumkin nahīñ ki ab bhī
firāq kī talḳhiyāñ vahī haiñ visāl kī aarzū vahī hai

visāl-e-jism kī sūrat nikal to aatī hai
diloñ meñ hijr kā mausam bahāl rahtā hai

visāl hī visāl hai firāq ab muhāl hai
maiñ tere har libās kī tarah tire badan pe huuñ

shab-e-visāl meñ he he vo un kā sharmā kar
dabī zabān se kahnā ki aarzū kyā hai

ummīd-e-visāl ab kahāñ hai
us gul se ba-rañg-e-bū judā huuñ

koī qissa hijr-o-visāl kā na sunā mujhe
jo harīm-e-dard tak aa gayā so vahīñ milā

uf-re sitam ki bahr-e-duā-e-visāl-e-ġhair
vo paañv chal ke aa.e haiñ mere mazār tak

tire visāl ke mausam meñ ustuvār huā
koī ajab sā ta.alluq jahān-e-fānī se