Tags-Visaal

visāl-e-yār mayassar na ho to kyā ġham hai
ḳhayāl-e-yār to hai jis ko dil-sitāñ kahiye

nisāb-e-ishq meñ hijr-o-visāl ek se haiñ
hai mere hijr kā rishta tire visāl meñ gum

agar hañgāma-hā-e-shauq se hai lā-makāñ ḳhālī
ḳhatā kis kī hai yā rab lā-makāñ terā hai yā merā

furqat meñ ham-baġhal jo huā 'barq' gor se
hasrat visāl-e-yār kī dil se nikal ga.ī

visāl-o-hijr ke mausam guzar ga.e ki 'bashīr'
jalā rahe haiñ na ham ab bujhā rahe haiñ charāġh

'hirmāñ' ko maut aa.e shab-e-hijr to kahe
kyūñkar guzārtā hai umīd-e-visāl meñ

na ḳhush visāl meñ ho rakh tū yād-e-hijr 'nasīr'
magar tū gardish-e-ayyām se nahīñ vāqif

murdā hai be-visāl rahe go ki jāgtā
sotā huuñ yaar saath so zindoñ meñ jāgnā

hijr-o-visāl ke na.e manzar bhī ā.eñge
ābādiyoñ meñ aa.e to phir ghar bhī ā.eñge

'asad' bahār-e-tamāshā-e-gulistān-e-hayāt
visāl-e-lāla azrān-e-sarv-qāmat hai

ishq karo to ye bhī socho arz-e-savāl se pahle
hijr kī puurī raat aatī hai sub.h-e-visāl se pahle

raat badan yuuñ lau dete the jaise sandal jaltā ho
lekin dil-e-dīvāna chāhe aur bhī kuchh ho visāl ke ba.ad

kahīñ to ḳhatm huā hogā raat kā afsūñ
vahīñ pe uqda-e-sub.h-e-visāl rakhnā hai

ik raat dil-jaloñ ko ye aish-e-visāl de
phir chāhe āsmān jahannam meñ Daal de

raat phir āñkhoñ se bah niklī tamannā-e-visāl
aisā lagtā thā ki tū bhī darmiyāñ maujūd hai

akelā ishq hai hijr-o-visāl kuchh bhī nahīñ
bas ek ālam-e-dīvāngī hai aur maiñ huuñ

ye jhuktī shāḳheñ sarakte saa.e mahaktī ḳhushbū bahakte bādal
uTho inheñ jāvedāñ to kar leñ ki sā.ateñ ye visāl kī haiñ

kahāñ se duniyā ko aa ga.e haiñ ye taur us ke tarīq us ke
muzāhira sab gurez kā hai alāmateñ sab visāl kī haiñ

hijr phailā hai puure kamre meñ
pars meñ par visāl rakkhā hai

vo siyāh-rañg shamīm-shām-e-visāl kī jo naved hai
is alam-gazīda firāq meñ vahī zulf yaad phir aa ga.ī