Tags-Wada

khā us kī qasam jo na tujhe dekh chukā ho
tere to farishtoñ se bhī va.ada na vafā ho

ārzūeñ hasrateñ va.ada o paimān-e-vafā
surḳhiyāñ kitnī milī haiñ ik fasāne ke liye

mutma.in rah dilā vo jān-e-jahāñ
vaada kar ke kahīñ mukartā hai

likh na paa.e jo kisī kī nīm-bāz ā.ankhoñ kā raaz
vo ye va.ada kar rahe haiñ 'mīr' ban jā.eñge ham

va.ada karne kā iḳhtiyār rahā
baat karne meñ kyā burā.ī hai

va.ada visāl kā na koī sach kiyā kabhī
tum ko bhī jhuuT bolne kā ho gayā maraz

pahuñchā ke ham ko qabr meñ jaate haiñ apne ghar
lījiye unhoñ ne vaada kiyā thā nibāh kā

kyā jab aane kā iqrār aap bhuul ga.e
ye ek va.ada to shāyad kabhī vafā na huā

hashr ke din kī raat ho ki na ho
apnā va.ada vafā kare koī

qahat-e-vafā-e-ahd-o-paimāñ hai in dinoñ
zoroñ pe ehtiyāt-e-dil-o-jāñ hai in dinoñ

bevafā kahne kī shikāyat hai
to bhī vāda-vafā nahīñ hotā

shab-e-vāda hamesha se yahī māmūl hai apnā
sahar tak rāh-e-shoḳh-e-sust-paimāñ dekh lete haiñ

ġhālib aa.ī farāmushī us kī
vaada taḌpā kiyā vafā ke liye

un va.ada-faroshoñ se kyā kījiye shikva
khā khā ke mire sar kī qasam bhuul ga.e haiñ

tum aur apne va.ade pe aa jaao shaam se
kyā baat ban paḌī hai ḳhudā-sāz dekhnā

vo aate na aate shab-e-va.ada lekin
mujhe de ke sar kī qasam dekhnā thā

tū jo hasb-e-va.ada na aa sakā to bahānā aisā nayā banā
ki tirā vaqār bhī kam na ho mirā e.atibār bhī kam na ho

tum ne va.ada to kar liyā lekin
saañs kā koī e'tibār nahīñ

īfā-e-va.ada aap se ai yaar ho chukā
us kā to imtihān ka.ī baar ho chukā

zamāne ko zamāne kī paḌī hai
hameñ va.ada nibhāne kī paḌī hai