Tags-Wafa

vo laakh be-ḳhabar-o-be-vafā sahī lekin
talab kiyā hai gar us ne to jaanā bantā hai

ye fitrat husn kī hai aur vo tīnat mohabbat kī
jise tum ne jafā samjhā use ham ne vafā jaanā

kis jafā-kār kī vafā hai jaañ
kis sitam-kash kā mudda.ā hai dil

har ghaḌī kyuuñ na zalzale meñ rahe
mash.had-e-hasrat-o-vafā hai dil

sar-chashma-e-aḳhlāq vafā-kesh-o-vafā-kosh
ai mashriq-e-ishrāq-e-safā abr-e-ḳhatā-posh

sab mujhe mashvara-e-tark-e-vafā dete haiñ
un kā iimā bhī ho shāmil to maza aa jaa.e

vo kaḌī dhuup ke din vo tapish-e-rāh-e-vafā
vo savād-e-shab-e-gesū ke ghanere saa.e

dasht-e-vafā meñ jal ke na rah jaa.eñ apne dil
vo dhuup hai ki rañg haiñ kaale paḌe hue

koī sauġhāt-e-vafā de ke chalā jā.ūñgā
tujh ko jiine kī adā de ke chalā jā.ūñgā

jise aap ginte the āshnā jise aap kahte the bā-vafā
maiñ vahī huuñ 'momin'-e-mubtalā tumheñ yaad ho ki na yaad ho

hue ittifāq se gar baham to vafā jatāne ko dam-ba-dam
gila-e-malāmat-e-aqribā tumheñ yaad ho ki na yaad ho

hamārī nākāmī-e-vafā ne zamāne kī khol dī haiñ āñkheñ
charāġh kab kā bujhā paḌā hai magar añdherā kahīñ nahīñ hai

vafā kī haamī hamiyyat un kī harīf-e-ummīd ġhairat un kī
nigāheñ iqrār kar rahī haiñ zabāñ pe lekin nahīñ nahīñ hai

aazmā lo ki dil ko chain aa.e
ye na kahnā kahīñ vafā hī nahīñ

vafā nazar nahīñ aatī kahīñ zamāne meñ
vafā kā zikr kitāboñ meñ dekh lete haiñ

hamāre vāste zanjīr-o-tauq gahnā hai
vafā ke shauq meñ gāñdhī ne jis ko pahnā hai

ġharīb maañ ke liye dard-dukh uThā.eñge
yahī payām-e-vafā qaum ko sunā.eñge

vaa.e mahrūmi-e-taslīm-o-badā hāl-e-vafā
jāntā hai ki hameñ tāqat-e-faryād nahīñ

shikva us but ke jafā kā jo kiyā maiñ to kahā
tum to duniyā meñ ho ik ahl-e-vafā tum ko kyā

hai haq ba-taraf us ke chāhe sau sitam kar le
us ne dil-e-āshiq ko majbūr-e-vafā jaanā