Tags-Wafa

jafā ho yā vafā ham sab meñ ḳhush haiñ
kareñ kyā ab to dil aTkā huā hai

kabhī to un ko hamārā ḳhayāl aa.egā
ham is umiid pe tark-e-vafā nahīñ karte

vafā ke baab meñ kār-e-suḳhan tamām huā
mirī zamīn pe ik ma.arka lahū kā bhī ho

fareb khāne ko pesha banā liyā ham ne
jab ek baar vafā kā fareb khā baiThe

ab rāh-e-vafā ke patthar ko ham phuul nahīñ samjheñge kabhī
pahle hī qadam par Thes lagī dil TuuT gayā achchhā hī huā

bād-e-sabā ye zulm ḳhudā-rā na kījiyo
is bevafā se zikr hamārā na kījiyo

ham ko ye bhī ḳhabar nahīñ 'gulzār'
kab but-e-bevafā ne luuT liyā

ik but-e-bevafā ne luuT liyā
mujh ko tere ḳhudā ne luuT liyā

dasht-e-vafā meñ yuuñ na bhaTak dar-ba-dar 'naved'
sar ban gayā hai bojh to patthar talāsh kar

ab to dūkānoñ pe biktī hai vafā
dosto ifrāt-e-zar kī baat hai

jo sañg-e-mīl hai rāh-e-vafā kā
use rasta batāne jā rahe ho

jafā ho yā vafā us kā karam yuuñ bhī aur yuuñ bhī
navāzish roz-o-shab aur dam-ba-dam yuuñ bhī hai aur yuuñ bhī

fitrat hī ḳhud azal se hai sar-gufta-e-vafā
ai ḳhizr koī ishq kā rahbar nahīñ huā

saḳht dushvār hai pābandi-e-ā.īn-e-vafā
baat to jab hai tujhe maat na hone paa.e

jab bhī vo baiThte haiñ likhne ko iqrār-e-vafā
gaañv bhar meñ kahīñ miltā nahīñ purza kāġhaz

nigāh-e-yār, ġham-e-jāñ-gusil kā kyā hogā
tire karam se nasīb-e-vafā sañvar hī na jaa.e

vafā kī raah meñ khaa.e haiñ aise bhī kabhī dhoke
vo zālim ibtidā niklī jise maiñ intihā samjhā

kisī ne bā-vafā samjhā kisī ne bevafā samjhā
mujhe ġhairoñ ne kyā samjhā mujhe apnoñ ne kyā samjhā

itnī jafā-tarāziyāñ itnī sitam-shi.āriyāñ
tum bhī chale ho kuchh qadam ahl-e-vafā ke saath saath

qarz-e-nigāh-e-yār adā kar chuke haiñ ham
sab kuchh nisār-e-rāh-e-vafā kar chuke haiñ ham