Tags-Wafa

vafā kī raah ke pakke haiñ ham musāfir bhī
mileñ na manzileñ rasta nahīñ badalte ham

ham se baḌhī masāfat-e-dasht-e-vafā ki ham
ḳhud hī bhaTak ga.e jo kabhī rāsta milā

magar ye dard-e-talab bhī sarāb hī niklā
vafā kī lahr bhī jazbāt ke bahāv kī thī

tū āshiq hai vafā terā hunar hai ishq meñ varna
mirā gul be-vafā hai kyā ise qadr-e-vafā bulbul

hameñ bhī aa paḌā hai dostoñ se kaam kuchh ya.anī
hamāre dostoñ ke bevafā hone kā vaqt aayā

tavāzun rishtoñ meñ rakkhā hai qaa.em
jafā ne aap kī merī vafā ne

salāsil toḌnā mushkil nahīñ thā
mujhe rokā sadā ahd-e-vafā ne

husn ik ishq kī soī huī kaifiyyat hai
ishq hai husn kā bedār-e-vafā ho jaanā

rasm-e-ādāb-o-mohabbat kā vo pāband kahāñ
jis kī taqdīr meñ ho nazr-e-vafā ho jaanā

jab us ne toḌ diyā rishta-e-vafā 'tāriq'
to phir ye kis liye us kā hai intizār mujhe

jafā ho yā ki vafā maiñ asīr-e-dard rahā
kisī bhī taur na aayā kabhī qarār mujhe

ab e'tirāf-e-jafā aur kis tarah hogā
ki terī bazm meñ qisse mirī vafā ke chale

burā mat maan itnā hausla achchhā nahīñ lagtā
ye uThte baiThte zikr-e-vafā achchhā nahīñ lagtā

yuuñ to sab kuchh bhuul chukā huuñ tark-e-vafā ke ba.ad magar
dard uThā jab dil meñ mere terī nishānī yaad aa.ī

abhī na de mujhe āvāz ai ġham-e-jānāñ
abhī to shahr-e-vafā meñ baḌā añdherā hai

vafā nisār ho us kī vafā-shanāsī par
hazār gardishoñ ke ba.ad bhī jo merā hai

arbāb-e-vafā kī jāñ-gudāzī dekhī
aur is pur-sitam kī sarfarāzī dekhī

tark karnī thī har ik rasm-e-jahāñ
haañ magar rasm-e-vafā rakhnī hī thī

ab bhī hai mo'tabar to ḳhudā kī atā hai ye
varna vafā ke naam pe kyā kyā nahīñ huā

ruḳhsat hue to rail kī siiTī meñ der tak
aisā lagā ki jaise vafā chīḳhtī rahī