Tags-Wafa

vo hameñ kaise bhalā ahl-e-vafā mānegā
ḳhud pe nāzāñ hai adāoñ kā sila mānegā

haañ vo nahīñ ḳhudā-parast jaao vo bevafā sahī
jis ko ho diin o dil aziiz us kī galī meñ jaa.e kyuuñ

uTh ke ik bevafā ne de dī jaan
rah ga.e saare bā-vafā baiThe

ham se koī ta.alluq-e-ḳhātir to hai use
vo yaar bā-vafā na sahī bevafā to hai

jashn hogā phir vafā kā dostī kā ek din
phir sajegī pyaar ke ehsās kī ik anjuman

un kī sāzish hai ki bas nām-e-vafā miTtā rahe
merī koshish hai phale-phūle vafāoñ kā chalan

abhī bāteñ bahut pyārī karoge
magar kal kyā vafā-dārī karoge

kis kis kā e'timād-e-vafā ho gayā shikast
kis kis ko husn se hai gilā dekhte chalo

maiñ ne jin ke liye rāhoñ meñ bichhāyā thā lahū
ham se kahte haiñ vahī ahd-e-vafā yaad nahīñ

mire lahū se mo.attar tire laboñ ke gulāb
tirī vafā se kañval mere dil ke khilte haiñ

kitne arbāb-e-himmat ne un ke liye baḌh ke maidān meñ jaan bhī haar dī
ab bhī un kī nigāhoñ meñ hai bad-zanī ab bhī un ko vafā kī sanad chāhiye

gum huī jab andheroñ meñ rāh-e-vafā ham ne sham-e-junūñ se ujālā kiyā
jab na paa.ī koī shakl-e-baḳhiya-garī ham ne kāñToñ se zaḳhmoñ ke muñh sī liye

ishq ko kab yaad thī rasm-e-vafā
husn kā kis muñh se shikvā kījiye

vaah re pās-e-vafā allāh rī sharm-e-ārzū
har nafas hamrāhī-e-umr-e-gurezāñ meñ rahā

tārīkiyāñ nasīb thiiñ isyān-e-zīst ko
raushan jo thā vo merī vafā kā hisār thā

ḳhulūs pyaar vafā sab usī ke saath ga.e
mohabbatoñ ke nishāñ sab miTā gayā paanī

pattharoñ se kab talak bāñdhegī ummīd-e-vafā
zindagī dekhegī kab tak jāgtī āñkhoñ se ḳhvāb

fazā.eñ nik.hat meñ Dhal rahī haiñ vafā kā iqrār ho rahā hai
ḳhud apne jalvoñ meñ vo bhī gum haiñ hameñ bhī apnī ḳhabar nahīñ hai

mujh ko apnā samajh rahī hai tū
maiñ kisī aur bevafā kā huuñ

ham jo bhaTke bhī to kis shān-e-vafā se bhaTke
ham ne har laġhzish-e-pā meñ tirā iimā dekhā