Tags-Wafa

shoḳhī-e-rañg-e-hinā ḳhūn-e-vafā se kab tak
āḳhir ai ahd-shikan tū bhī pashemāñ niklā

umiid us se ġhalat samjhā ye o dil
sitamgar se tamannā-e-vafā kyā

kuchh to majbūriyāñ rahī hoñgī
yuuñ koī bevafā nahīñ hotā

koī barsā na sar-e-kisht-e-vafā
kitne bādal guhar-afshāñ guzre

aaj us badan pe bhī nazar aa.e talab ke daaġh
dīvār par bhī naqsh vafā ne banā.e haiñ

us ke dil meñ ḳhud vafā nā-paid thī
dostī kī bhiik kyā detā mujhe

tark-e-vafā par sochā thā hāfiz-sāhib se baat karūñ
ab Dartā huuñ jaane kaisī ulTī sīdhī faal khule

ek TuuTā huā paimān-e-vafā yaad aayā
yaad aayā bhī mujhe aaj to kyā yaad aayā

jab kisī ko koī ummīd vafāoñ kī na thī
mujhe us pal tirā paimān-e-vafā yaad aayā

TuuTā to aziiz aur huā ahl-e-vafā ko
dil bhī kahīñ us shoḳh kā paimāñ to nahīñ hai

hai mohabbat aisī bañdhī girah jo na ek haath se khul sake
koī ahd toḌe kare daġhā mirā farz hai ki vafā karūñ

isī kā naam hai shā.istagī o pās-e-vafā
palak tak aa ke jo aañsū thamā thamā sā lagā

vo yuuñ milā ki ba-zāhir ḳhafā ḳhafā sā lagā
na jaane kyuuñ vo mujhe phir bhī bā-vafā sā lagā

ḳhvāhish-e-dasht-navardī kabhī hotī na mujhe
bevafā tū mire ghar par kabhī aatā jaatā

bevafā logoñ meñ rahnā tirī qismat hī sahī
in meñ shāmil maiñ tirā naam na hone dūñgā

umiid ahd-e-vafā aur un butoñ se 'shakīl'
jo bhuul kar bhī kisī se vafā nahīñ karte

kuchh husn-e-vafā ke dīvāne phir ishq kī raah meñ kaam aa.e
ai kaash tamāshā karne ko ḳhud tū bhī kanār-e-bām aa.e

ahl-e-zamāna ko bas merī ik rusvā.ī yaad rahī
varna merī vafā ke jaane kitne aur bhī unvāñ haiñ

sar jo jhukā us shoḳh ke aage aur kahīñ phir jhuk na sakā
maslak-e-mehr-o-vafā meñ vaa.iz ham kāfir bhī musalmāñ haiñ

karte raheñge tum se mohabbat bhī vafā bhī
go tum ko mohabbat na vafā yaad rahegī