Tags-Wafa

husn sarshārī-e-andāz-o-adā se guzrā
aur sab ahl-e-vafā rasm-e-vafā bhuul ga.e

vaqt ke hāthoñ hikāyāt-e-anā bhuul ga.e
ham vafā bhuul ga.e aap jafā bhuul ga.e

dayār-e-teġh-o-dār ke jamāl ko nikhār ke
ham apne ḳhuuñ se maqtal-e-vafā sañvār aa.e haiñ

ghaTtī jaatī hai un kī mehr-o-vafā
baḌhtī jaatī hai be-ḳhudī dil kī

vafā kareñge nibāheñge baat māneñge
tumheñ bhī yaad hai kuchh ye kalām kis kā thā

vo sitam-shi.ār sahī magar hai vahī qarār-e-dil-o-nazar
vo rahe to rasm-e-vafā rahe na rahe to rasm-e-vafā ga.ī

harf-e-vafā kī chhāñv meñ Thahro na din Dhale
koī kisī kā kab hai sadā kaan na dharo

jo talab pe ahd-e-vafā kiyā to vo ābrū-e-vafā ga.ī
sar-e-ām jab hue mudda.ī to savāb-e-sidq-o-safā gayā

kaun se muñh se karoge ye bhalā ahd-e-vafā
tum ki kahte the ye pāband-e-vafā kuchh bhī nahīñ

in kī jabīñ pe ḳhair se ik rañg aa gayā
merī vafā agarche musallam na ho sakī

uḌ ga.ī yuuñ vafā zamāne se
kabhī goyā kisī meñ thī hī nahīñ

tumhārī yaad kitnī bā-vafā hai
ki jab aa.ī hai to aa.ī bahut hai

dil kī taḌap ke vāste mahbūb nā-guzīr
rāh-e-vafā meñ ġham ke kināyāt ham-safar

samajhte haiñ vo farz is kī shikast
mirā dil bhī ahd-e-vafā ho gayā

dāġh-e-dil ko raushan kar ġham kī raat hai lambī
sham.a kā bharosa kyā mah bhī bevafā sī hai

ye jānte haiñ ki me.arāj-e-zindagī kyā hai
vafā kī raah meñ karte haiñ sar qalam apnā

bijlī kī chamak meñ sho.ale haiñ phūloñ kī hañsī meñ aañsū haiñ
ye 'fazl' vafā kī duniyā hai phir bhī to vafā kā naam nahīñ

koī purānā sāthī bhī shāyad hī hameñ pahchān sake
varna ik din shahr-e-vafā meñ apnā sikka chaltā thā

ḳhud ko na bhuul jā.ūñ to kyā sajda-e-vafā
allāh mere ishq ko dīvāngī bhī de

do ghaḌī bhar ke liye bhī na rahā saath tirā
bin tire shahr meñ ham pās-e-vafā kaise kareñ