Tags-Wafa

usī bevafā paas phir kuchh umīdeñ
liye jā rahī haiñ chale jā rahe haiñ

lage haiñ dil se ubharne vafā ke afsāne
ki apne haal pe phir koī mehrbāñ sā hai

ḳhvāh kare vafā-o-mehr ḳhvāh kare jafā-o-jaur
dilbar-e-shoḳh-o-shañg se ab to milā jo ho so ho

jaan par apnī khel kar 'manshā'
karne vāloñ ne yaañ vafā kī hai

vafā-o-mehr-o-altāf-o-karam the ham-ināñ kyā kyā
hue haiñ apne hī dil se magar ham bad-gumāñ kyā kyā

haar hī jiit hai ā.īn-e-vafā kī rū se
ye vo baazī hai jahāñ jiit ke haare saare

sochā tujhe dekhā tujhe chāhā tujhe puujā tujhe
merī ḳhatā merī vafā terī ḳhatā kuchh bhī nahīñ

sālik-e-rāh-e-vafā hai dil-e-āshufta-mizāj
muzhda-e-gumrahi-e-shauq-e-safar se pahle

abhī tālīm-e-vafā yaanī jafā kā nahīñ vaqt
tarbiyat shauq kī ho lutf-e-nazar se pahle

tum ne vo sitam Dhaa.e haiñ arbāb-e-vafā par
tārīḳh ke aurāq bhī sharminda raheñge

nādān dil ko us se vafā kī umiid hai
jo bevafā kisī kā abhī tak huā nahīñ

mehr-o-vafā nahīñ haiñ ki sabr-o-razā nahīñ
ham afqaroñ ke kīsa-e-ḳhākī meñ kyā nahīñ

yahī to merī vafā kā sila diyā hai mujhe
ki tum ne bhuul samajh kar bhulā diyā hai mujhe

husn aisā hai tumhārā ki nahīñ jis kā javāb
is liye jān-e-vafā tum to savāloñ meñ raho

donoñ hī barābar haiñ rah-e-ishq-o-vafā meñ
jab tum ne vafā kī hai to ham ne bhī vafā kī

va.ada-e-ulfat-o-paimān-e-vafā se tauba
tajraba kahtā hai us husn-e-adā se tauba

ab kahāñ tum kahāñ vo rabt-e-vafā
yaad bhī jis kī ham dilā na sake

unheñ bhī apnī taraf khīñch lo vafā vāloñ
jo ḳhuun bech ke ghuñghrū talāsh lete haiñ

vafā kī manziloñ ko ham ne is tarah sajā liyā
qadam qadam pe ik charāġh-e-ārzū jalā liyā

sunā hai us ke ahd-e-vafā meñ havā bhī muft nahīñ miltī
un galiyoñ meñ har har saañs pe bharte haiñ jurmāne log