Tags-Wafa

safar vafā kā adhūrā adhūrā hai jaan lo 'nāyāb'
ki jab talak na dil-o-jāñ lahū lahū ho leñ

ai ḳhudā ajab hai tirā jahāñ mirā dil yahāñ pe lagā nahīñ
jahāñ koī ahl-e-vafā nahīñ kisī lab pe harf-e-duā nahīñ

merī vafā kā un ko mile hashr meñ sila
mil jaa.eñ un ke naam ke jaur-o-jafā mujhe

har bām-o-dar se ek ishāra hai roz-o-shab
ne maiñ vafā ko chhoḌ sakā ne vafā mujhe

dil dukhāte ho bevafā kah kar
kyā mujhe aazmā nahīñ sakte

phūloñ se rahā ḳhālī dāmān-e-vafā apnā
kāñTe hī mile ham ko gulshan se bayābāñ tak

tamām josh-e-mohabbat tamām hirs-o-havas
vafā ke naam pe har bevafā se qaa.em hai

vafā kā naam jab uTh jā.egā bedard duniyā se
vo ro.eñge bahut ham ko jo ab barbād karte haiñ

rahm kar zālim ki kyā būd-e-charāġh-e-kushta hai
nabz-e-bīmār-e-vafā dūd-e-charāġh-e-kushta hai

pās-e-adab se ik ik kāñTā ham ne chunā hai palkoñ se
āḳhir kuchh tāzīm thī lāzim dasht-e-vafā ke ḳhāroñ kī

kyā kī vafā ki mauj-e-guhar sā hai sar se band
ḳhanjar juz ek dam kā mirā āshnā na thā

ik shart hai yaañ ḳhushbu-e-vafā yaad aa.e to karnā yaad zarā
jab tum pe bharosā thā gul kā kyā mahke kyā mahkā.e ga.e

vafā kā mahaktā huā phuul ban kar
mahak apnī ham par luTā kar to dekho

toḌ kar rishta yuuñ ilzām lagāne vaale
bevafā maiñ huuñ agar tū bhī to harjā.ī hai

terī vafā ne aisā sabaq de diyā mujhe
mujh ko kisī bhī zaat se nafrat nahīñ rahī

kaisā samāñ hai kaisī ye fasl-e-bahār hai
shahr-e-vafā ke phūloñ meñ nik.hat nahīñ rahī

pahle har shaḳhs thā iḳhlās-o-vafā kā paikar
ab ye daulat bhī kahāñ miltī hai do-chār ke paas

ilm-o-hunar sadāqat-o-mehr-o-vafā ḳhulūs
bāzār meñ kisī kī bhī qīmat nahīñ rahī

har aadmī se vafā kī umiid mat rakkho
har ik zamīn se sonā nahīñ nikaltā hai

tere kūche meñ mirī ḳhaak bhī pāmāl huī
thā vo be-dard mujhe jin ne vafā ko sauñpā