Tags-Wafa

ḳhūgar-e-zulm ho gayā aisā
mujh ko lutf-e-vafā nahīñ miltā

tum vo nahīñ ho jin se vafā kī ummīd hai
tum se mirī murād zamāna hai aur bas

ai 'ziyā' kījiyo samajh ke kalām
vo sanam to hai bevafā gustāḳh

vafā se manzil-e-tark-e-vafā tak aa nikle
kisī bahāne to patthar kabhī gudāz to ho

'faizī' kitne bā-vafā hote haiñ dost
vaqt paḌte hī patā chal jā.egā

haañ ham ne bhī aaj kisī kā nāzuk sā dil toḌā hai
shahr-e-vafā kī rasm yahī hai ham is par sharmā.eñ kyuuñ

arzāñ hai zulm-o-jaur kī uftādgī magar
jins-o-vafā-o-mehr-e-garāñ dekhtā huuñ maiñ

rāh-e-vafā meñ pair na rakh
ik dīvāna kahtā thā

kuuch kar jā.eñge sab dasht-e-vafā se qāfile
ḳhvāb āñkhoñ meñ liye maiñ soī hī rah jā.ūñgī

nahīñ chāhtī maiñ sivā is ke kuchh bhī
agar de sako to vafā chāhtī huuñ

tū kyuuñ paas se uTh chalā baiThe baiThe
huā tujh ko kyā bevafā baiThe baiThe

Thahar ke sun to sahī ġham kī Dūbtī āvāz
palaT ke dekh to le manzar-e-shikast-e-vafā

jafā-o-jaur ke qisse haiñ ab bhī mo'atabar 'fāriġh'
vafā kī baat zeb-e-dāstāñ mālūm hotī hai

vafā-koshī kā jazba sard paḌ jaatā hai piirī meñ
vafā parvarda-e-fikr-e-javāñ mālūm hotī hai

rāh-e-vafā pe kam haiñ ḳhasāre hamāre dost
haiñ is safar ke apne sitāre hamāre dost

bevafā likhte haiñ vo apne qalam se mujh ko
ye vo qismat kā likhā hai jo miTā bhī na sakūñ

ġham kī tash.hīr se ho jaatī hai tauhīn-e-vafā
is aziyyat ke hisābāt kise pesh karūñ

vafā kī nagrī luTī to us ke asāsoñ kā bhī hisāb Thahrā
kisī ke hisse meñ zaḳhm aa.e kisī ke hisse meñ phuul aa.e

ab aise qisse se fā.eda kyā ki kaun kitnā vafā-nigar thā
jab us kī mahfil se aa ga.e aur saarī bāteñ hī bhuul aa.e

mahīnoñ haath joḌe kī ḳhushāmad bār-hā barsoñ
inheñ jhagḌoñ meñ mujh ko ho ga.e ai bevafā barsoñ