Tags-Wafa

na hote dil se jo majbūr kar ke tark-e-vafā
use bhī ham zarā taḌpā ke tajraba karte

hamīñ ne sehn-e-chaman meñ uḌaa.ī ḳhāk-e-vafā
hamīñ ne dasht meñ phūloñ kā kārobār kiyā

aise hālāt meñ ik roz na jī sakte the
ham ko zinda tire paimān-e-vafā ne rakkhā

taqdīr meñ izāfa-e-soz-e-vafā huā
dil meñ jo tum ne aag lagā dī to kyā huā

ye bazm-e-yārān-e-ḳhud-numā hai na kar ḳhulūs-e-vafā kī bāteñ
sabhī to haiñ mudda.ī vafā ke yahāñ koī bevafā kahāñ hai

vafā kī tash.hīr karne vaalā fareb-gar hai sitam to ye hai
nigāh-e-yārāñ meñ phir bhī vo shaḳhs mo'tabar hai sitam to ye hai

pyaar vafā kā chalan na ho gar dil se dil ko raah na ho
aisī ravish to is duniyā ko kar degī maj.hūl miyāñ

kahīñ girtī huī dīvāreñ kahīñ jhuktī chhateñ
aap kahte haiñ to ye qasr-e-vafā hī hogā

bevafā.ī karke niklūñ yā vafā kar jā.ūñgā
shahr ko har zā.iqe se āshnā kar jā.ūñgā

jāntā huuñ ki vafā jī se guzarnā hai magar
yuuñ na de ta.an ki jiinā mujhe mushkil ho jaa.e

ye kis ne kahā tum se ki rūdād-e-vafā ko
sun kar bhī samajhne kī zarūrat na samajhnā

kis se kareñ umīd-e-vafā is jahān meñ
is dil ko jin pe naaz thā vo bhī badal ga.e

ye soch kar tire dāman se haath khīñch liyā
kahīñ ye dast-e-vafā tujh ko nāgavār na ho

ye dasht-e-hijr kī vahshat hai sāhibān-e-vafā
yahāñ kisī ko koī aasrā nahīñ miltā

ajiib shahar hai kūfa-mizāj logoñ kā
koī bhī shaḳhs qarīn-e-vafā nahīñ miltā

miTāte jo rahe mujh ko mujassam zulm ban ban kar
unhīñ ke dil pe maiñ ubhrā kiyā naqsh-e-vafā ho kar

kitne tūfānoñ ko sar kartī hai ik sham-e-vafā
aur vo sham-e-vafā dard-e-jigar hai ai dost

ḳhud apne dil ko banā le tū āstān-e-vafā
haram kī nāsiya-sā.ī to koī baat nahīñ

āsmānoñ se aa.e hue nuur the rashk-e-mahtāb the
vo to bāġh-e-vafā ke ajab phuul the ḳhushbu-e-ḳhvāb the