Tags-Wafa

terī vafā kā ham ko gumāñ is qadar huā
aayā nazar na kuchh bhī dhuāñ is qadar huā

bedād-e-vafā dekh ki jaatī rahī āḳhir
har-chand mirī jaan ko thā rabt laboñ se

un kī jafāoñ par bhī vafā kā huā gumāñ
apnī vafāoñ ko bhī farāmosh kar diyā

us bevafā se kar ke vafā mar-miTā 'razā'
ik qissa-e-tavīl kā ye iḳhtisār hai

mar gayā dil vafā ke dhoke meñ
na sunī tum ne vārdāt us kī

is dasht-e-vafā meñ qais bhī hai aur shaiḳh bhī hai mushtāq-e-milan
jo vasl nahīñ to kyā ġham hai kuchh lamhe ibārāñ aur sahī

ham bhī kisī ḳhayāl ke sannāhaToñ meñ gum
tum se bhī pās-e-ahd-e-vafā ho nahīñ rahā

abhī se hijr kī talḳhī meñ mar jā.ūñgā jān-e-jāñ
abhī mausam vafā kā hai jafā.eñ nā-munāsib haiñ

dushmanī hai use arbāb-e-vafā se lekin
ye na hoñge to inheñ yaad karegī duniyā

ḳhulūs dard mohabbat vafā ravādārī
ye naam ham ne kisī āshnā ke rakkhe haiñ

sajdoñ kā bhī mauqa.a na rahā ahl-e-vafā ko
phir phir ke miTāte haiñ vo naqsh-e-kaf-e-pā ko

parinda be-ruḳhī kā uḌ rahā hai
vafā kā ik shajar hai aur maiñ huuñ

sūraj ta.alluqāt kā Dhalne pe aa gayā
mere junūñ meñ shor hai terī vafā meñ chup

merī nigāh-e-sharmagīñ jhuktī chalī ga.ī
us kā bhī shauq-e-mehr-o-vafā pur-asar gayā

paimāñ vafā ke bāñdh ke jaane kidhar gayā
sahrā-e-hijr mere liye ban bhañvar gayā

maiñ bevafā huuñ chalo ye bhī maan letā huuñ
bhale bure hī sahī tajrabāt rakh lete

jaagī hai dil meñ shahd-e-shahādat kī aarzū
rāh-e-vafā kā sañg-e-nishāñ honā hai abhī

jafā un se mujh se vafā kaise chhūTe
ye sach hai nahīñ chhuTtī aadat kisī kī

jab vo mujh ko dekhtā hai hañs ke kahtā hai 'rashīd'
kitnī pāband-e-vafā hai zindagānī aap kī