Tags-Wafa

jab vo mujh ko dekhtā hai hañs ke kahtā hai 'rashīd'
kitnī pāband-e-vafā hai zindagānī aap kī

miTTī se kheltā huā rizq-e-havā huā
'aḳhtar' ab aur sharh-e-vafā kyā kare koī

dekhā use to qarz-e-vafā yaad aa gayā
bātoñ meñ us kī ḳhū-e-irādat nahīñ rahī

dasht-e-vafā kī vus.atoñ ko pā sakā hai kaun
gum kis qadar hue haiñ yahāñ kārvāñ na pūchh

vafā ke haiñ ḳhvān par nivāle ze-a.āb avval do.am ba-ātish
bhare hai saaqī yahāñ pyāle ze-āb avval do.am ba-ātish

jehd-o-īsār se raushan hai vafā kī qindīl
dil-girafta haram-e-pāk kā me.amār sahī

is qadar rañj sahe dil ne vafā meñ 'ḳhātir'
aaj vo ham se jo bichhḌe bhī to sadma na huā

jo talab pe ahd-e-vafā kiyā to vo ābrū-e-vafā ga.ī
sar-e-ām jab hue mudda.ī to savāb-e-sidq-o-vafā gayā

ik rasm-e-vafā thī vo zamāne ne uThā dī
ik zahmat-e-be-kār thī uThtī bhī kahāñ tak

butān-e-shahr ham ahl-e-vafā se haiñ be-zār
butān-e-shahr ko ahl-e-vafā se kaam bhī hai

ik shahr-e-vafā ke band darīche āñkheñ mīche sochte haiñ
kab qāfila-hā-e-ḳhanda-e-gul ko in rāhoñ se guzarnā hai

hazār Thokareñ khā.īñ hazār sū 'bahzād'
jahān-e-husn meñ koī bhī bā-vafā na milā

jis ḳhaak se kahte ho vafā ham nahīñ karte
so.e haiñ usī ḳhaak meñ sultān hazāroñ

jafā se fitrat-e-āsūdgāñ tāmīr kī tum ne
vafā ko qismat-e-āshufta-hālāñ kar diyā ham ne

ye fareb-e-vafā nayā to nahīñ
yuuñ hī hotā rahā hamesha se

aaj vafā kī raah 'musāfir' dhundlī dhundlī lagtī hai
kohra jis ne barsāyā hai us bādal kī baat kareñ

kiyā jo bazm meñ zikr-e-vafā un kī to vo bole
nahīñ jo mudda.ā us baat ko phir kyuuñ uchhālā hai

is shahr-e-be-vafā meñ jafāoñ ke ba.ad bhī
'arpit' vafā ke phuul khilātā rahā huuñ maiñ