Tags-Wafa

'ḳhātir' ab ahl-e-dil bhī bane haiñ zamāna-sāz
kis se kareñ vafā kī talab apne shahr meñ

ek vafā ko le ke tumhārī saarī baazī khel ga.e
yāroñ ne to varna chalī thī kaisī kaisī chaal kaho

ġharaz-parast jahāñ meñ vafā talāsh na kar
ye shai banī thī kisī dūsre jahāñ ke liye

dil ko ham sarf-e-vafā samjhe the kyā ma.alūm thā
ya.anī ye pahle hī nazr-e-imtihāñ ho jā.egā

gar zikr-e-vafā se yahī ġhussa hai to ab se
go qatl kā vaada ho taqāzā na kareñge

tujhe jān-e-mehr-o-vafā kaheñ tujhe aks-e-shān-e-ḳhudā kaheñ
tujhe kyā se kyā hai banā diyā ye mirī nazar kā kamāl hai

kam se kam jazb-e-vafā itnā to kaam aa hī gayā
be-irāda un ke lab par merā naam aa hī gayā

jo zaḳhm khaa.e haiñ 'sattār' vo dikhā.ūñ bhī
vafā-shanās nahīñ huuñ to be-hunar bhī nahīñ

vafā kī raah meñ dushvār go safar bhī nahīñ
hazār sahal sahī lekin is qadar bhī nahīñ

duniyā samajh rahī hai use bevafā magar
raste se uTh gayā hai vo ghar to nahīñ gayā

bastī bastī aaj hamārī sa.ī-e-vafā kī shohrat hai
ham ne 'zahīr' ik aalam ko pāband-e-nigāh-e-yār kiyā

qīmat lagā sakā na ḳharīdār phir bhī maiñ
jins-e-vafā banā rahā bāzār-e-ishq meñ

'alī' bahr-e-mohabbat kā shanāvar huuñ ḳhudā shāhid
vafā ke naam pe ilzām ho jaane se Dartā huuñ

hāsil na hogā kuchh bhī juz dāġh-o-dard-e-ibrat
ahl-e-vafā hamārā naqsh-e-qadam na DhūñDeñ

us bevafā kī bazm se chashm-e-ḳhayāl meñ
ik ḳhvāb aarzū kā liye jā rahā huuñ maiñ

kis ne vafā ke naam pe dhokā diyā mujhe
kis se kahūñ ki merā gunahgār kaun hai

tum ko zabān de chuke dil kā jahān de chuke
ahd-e-vafā ko toḌ deñ apnī majāl bhī nahīñ

vo jo anā parast hai maiñ bhī vafā parast huuñ
us kī misāl bhī nahīñ merī misāl bhī nahīñ

dil meñ vafā kī hai talab lab pe savāl bhī nahīñ
ham haiñ hisār-e-dard meñ us ko ḳhayāl bhī nahīñ

gar kījiye insāf to kī zor vafā maiñ
ḳhat aate hī sab chal ga.e ab aap haiñ yā maiñ