Tags-Wafa

tum us kī yaad bhulā do ki bevafā hai vo
har ek dil nahīñ hotā tumhāre dil kī tarah

kyā jabr hai subūt-e-vafā pesh kījiye
aur un kā naam aa.e to phir lab na kholiye

Tuk ik insāf kar itnī bhī kartā hai jafā koī
karegā ba.ad mere kis tavaqqo.a par vafā koī

takmīl-e-vafā hosh meñ mumkin hī nahīñ thā
dīvāna samajh buujh ke dīvāna banā hai

tark-e-vafā kī baat kaheñ kyā
dil meñ ho to lab tak aa.e

tum ko chāhā thā magar tum bhī vafā-dost nahīñ
dil pe takiya thā magar dil bhī vafādār kahāñ

aaj bhī har phuul meñ bū-e-vafā āvāra hai
aaj bhī har zaḳhm meñ tere karam poshīda haiñ

khurach ke dekhūñgī hāthoñ kī sab lakīroñ ko
vafā nibhāne kā un meñ hunar nahīñ hai kyā

ham kyuuñ kareñ tumhārī vafā se koī gila
jab ḳhud hī kho ga.e the zamāne kī chaah meñ

tire alāva kahīñ aur bhī mulavvis huuñ
tirī vafā se mirī bevafā.ī jaarī hai

jin kitāboñ meñ vafā kā zikr aa.egā nazar
sabr kiije vo kitābeñ bhī jalā dī jā.eñgī

baat karne ko taras jā.eñge arbāb-e-vafā
bandisheñ itnī zabānoñ par lagā dī jā.eñgī

maiñ agar sūrat-e-parvāna fidā ho jaatā
un ko andāza-e-ā.īn-e-vafā ho jaatā

ajiib tarz se ab ke nibhāyā ulfat ko
vafā jo kī hai to is tarah ki vafā na lage

tarz-e-jafā bhī bhuul ga.ī kyā vafā ke saath
dil-dār gar nahīñ ho dil-āzār bhī nahīñ

kahīñ din Dhalā kahīñ shab huī kahīñ shaam aa.ī sahar ga.ī
kisī bevafā kī talāsh meñ mirī umr yuuñ hī guzar ga.ī

tū jafā-kesh rahā aur meñ vafā-kosh rahā
baat terī bhī mirī baat se aage na baḌhī

maut hai va.ada vafā karne kā naam
ik hayāt-e-nau kā hai āġhāz dost

kis ne vafā ke naam pe dhokā diyā mujhe
kis se kahūñ ki merā gunahgār kaun hai

masāfatoñ ko mile manzil-e-talab 'naināñ'
vafā kī raah meñ apnā Thikāna chāhtī huuñ