Tags-Wafa

tazād-e-sūrat-o-sīrat pe ab yaqīñ aayā
vo bevafā hai magar bā-vafā sā lagtā hai

shahīdān-e-vafā bhī jī uTheñge
koī jaadū jagā ab pūchhnā kyā

anjām-e-vafā bhī dekh liyā ab kis liye sar ḳham hotā hai
nāzuk hai mizāj-e-husn bahut sajde se bhī barham hotā hai

ek ummīd-e-masīhā.ī bhī āḳhir kab tak
phir na kahnā hameñ ādāb-e-vafā yaad nahīñ

jin ko tauqīr-e-rah-o-rasm-e-vafā yaad nahīñ
kyā gila un se kareñ jin ko ḳhudā yaad nahīñ

ye bhī koī bevafā.ī hai jo apne saath hai
bevafā logoñ kā shar hazrat alī se pūchhnā

ye mo.ajiza bhī kisī kī duā kā lagtā hai
ye shahr ab bhī usī bevafā kā lagtā hai

kisī ne apne girebāñ meñ kyā talāsh kiyā
hamāre raqs-e-vafā kā shumār karte hue

karte haiñ vo chaar āñkheñ yuuñ mil ke qayāmat meñ
goyā ki hai fardā kā ab va.ada vafā hotā

yaañ tark-e-vafā mushkil tum kyuuñ ki sitam chhoḌo
jo kuchh na huā mujh se vo aap se kyā hotā

sahtā huuñ sitam us ke ehsān hai duniyā par
gar maiñ na vafā kartā kyā jāniye kyā hotā

'naḳhshab' miTāyā jis ne vafāoñ kī aaḌ meñ
us bevafā se phir bhī mohabbat rahī mujhe

māhaul sāzgār-e-mizāj-e-vafā na thā
duniyā se bach ke un kī nazar dekhtī mujhe

vafā kā ahd thā dil ko sambhālne ke liye
vo hañs paḌe mujhe mushkil meñ Dālne ke liye

na vo husn hai na hijāb hai na vo ishq meñ tab-o-tāb hai
na vo ābrū-e-vafā rahī tire gaañv meñ mire shahr meñ

uTh chale vo to is meñ hairat kyā
un ke aage vafā kī qīmat kyā

tum ko mire andāz-e-vafā se hai shikāyat
tum mujh ko vafā kar ke dikhā kyuuñ nahīñ dete

maiñ jalātī rahī vafā ke charāġh
aur bujhātī rahī havā yūñhī

be-muravvat bevafā nā-mehrbāñ nā-āshnā
mere qātil mere hāsid mere dushman aap haiñ

yuuñ daad vo dete haiñ vafā kī
ye kaam nahīñ hai aadmī kā