Tags-Wafa

piinā nahīñ harām, hai zahr-e-vafā kī shart
aao uThā deñ aaj mai-e-jāñ-fazā kī shart

nargis-e-mahvishāñ se pūchh gardish-e-āsmāñ se pūchh
surma hue vafā-sarisht kyā kaheñ ai ḳhudā ki yuuñ

paḌhāyā tote ko ik umr bevafā niklā
azal ke bigḌe kisī se sudhar nahīñ jaate

vo vafā-o-mehr kī dāstāñ tujhe yaad ho ki na yaad ho
kabhī tū bhī thā mirā mehrbāñ tujhe yaad ho ki na yaad ho

īsār batānā hai mehrāb-e-vafā aksar
īsār ke hāthoñ se shamshīr nahīñ bantī

abhī ye jafā kā hai āġhāz ai dil
vafā ke abhī imtihāñ aur bhī haiñ

be-dil se ek kar ke vafā yuuñ lagā mujhe
ye haath ik machine kī ḳhidmat meñ aa gayā

maiñ zaḳhm zaḳhm ho gayā lahū vafā ko ro gayā
laḌā.ī chhiḌ ga.ī to mujh ko Dhaal kar diyā gayā

sham-e-vafā jalāte haiñ zulmat-kadoñ meñ jo
vo log is jahāñ meñ pareshāñ hue to haiñ

kyuuñ ahl-e-vafā zahmat-e-bedād-nigāhī
jiine ke liye aur bhī āzār bahut haiñ

kahte haiñ ki ab ham se ḳhatā-kār bahut haiñ
ik rasm-e-vafā thī so vafādār bahut haiñ

ḳhvāb ḳhushbū-e-talab rañg-e-havas nāz-e-vafā
saarā sarmāya gayā chaliye yahāñ se chaliye

us dushman-e-vafā ko duā de rahā huuñ maiñ
merā na ho sakā vo kisī kā to ho gayā

bane koī ilm o fan kā mālik ki maiñ huuñ rāh-e-vafā kā sālik
nahīñ hai shohrat kī fikr 'bāqar' ġhazal kā ik rāzdār kyā hai

abhī zulmat-e-ḳhirad meñ hai vafā kī tābnākī
ye charāġh bujh na jaa.e koī is kī lau baḌhā de

bas ik charāġh masāfat kā bojh sah legā
suḳhan ke biich talabgāri-e-vafā rakhnā

jahāñ meñ chaar din rah kar faqat bū-e-vafā denā
guloñ se maiñ sabaq letā huuñ ā.īn-e-sohbat kā

ham-safar tū jo nahīñ hai to ye dhaḌkā hai hameñ
thak na jaa.e kahīñ raste meñ vafā-koshī bhī

batā mujhe mire hamdam tū sochtā kyā hai
maiñ bā-vafā huuñ faqat ruḳh tirā badalne tak

tamām umr bhaTaktī rahī nazar ki kahīñ
mile koī jise nazrāna-e-vafā diije