Tags-Wafa

mirā ishq bhī ḳhud-ġharaz ho chalā hai
tire husn ko bevafā kahte kahte

vafā aġhyār kī aġhyār se sun
mirī ulfat dar o dīvār se pūchh

hairāñ huuñ ki ye shoḳh-o-hasīñ māh-jabīñ log
badle meñ vafāoñ ke vafā kyoñ nahīñ dete

shor-e-dariyā-e-vafā-e-ishrat ishrat-e-sāhil ke qarīb
ruk ga.e apne qadam aa.e jo manzil ke qarīb

uThā lene se to dil ke rahā maiñ
tū ab zālim vafā kar yā jafā kar

jaan de kar vafā meñ naam kiyā
zindagī bhar maiñ ek kaam kiyā

jab koī shaḳhs kahīñ zikr-e-vafā kartā hai
dil ko ai dosto taklīf baḌī hotī hai

bevafā huuñ na vafādār huuñ maiñ
sach to ye hai ki adākār huuñ maiñ

zikr-e-mehr-o-vafā to ham karte
par tumheñ sharmsār kaun kare

tazkira be-vafā kā ho rahā hai
ye tumhārī misāl thoḌī hai

dahr meñ ai 'azīz' apnī vafā
aap apnā javāb ho ke rahī

na kisī meñ husn-e-hayā rahā na kisī meñ bū-e-vafā rahī
abhī dosh-e-aql pe sar-basar koī dev-e-makr savār hai

marī vafā ne khilā.e the jo gulāb saare jhulas ga.e haiñ
tumhārī āñkhoñ meñ jis qadar the vo ḳhvāb saare jhulas ga.e haiñ

chāñd se maañd sitāroñ ne kahā āḳhir-e-shab
kaun kartā hai vafā ahd-e-vafā āḳhir-e-shab

hameñ hamārī vafā dasht dasht DhūñDegī
tumhāre husn kā charchā galī galī hogā

ham bhī kho jā.eñge ik roz ufuq par yūñhī
kab kisī se ye 'farah' ziist vafā kartī hai

mehr o vafā o lutf-o-ināyat ek se vāqif in meñ nahīñ
aur to sab kuchh tanz o kināya ramz o ishāra jaane hai

vo kaun hai jo nahīñ apnī maslahat kā ġhulām
kahāñ hai bū-e-vafā ab vafā ke bandoñ meñ

yaad aayā bhī to yuuñ ahd-e-vafā
aah kī be-asarī yaad aa.ī

kise bulāne ko is lāla-e-vafā ne 'hasan'
sabā ko merī taraf baar baar bhejā hai