Tags-Wafa

agar ahd-e-vafā se tū bhī phir jaa.e mohabbat meñ
'hijāb' us shoḳh ko mālūm ho jaa.e daġhā denā

bazm-e-vafā meñ aap se ik pal kā sāmnā
yaad aa gayā to ahd-e-shanāsā.ī ban gayā

chāhī thī dil ne tujh se vafā kam bahut hī kam
shāyad isī liye hai gilā kam bahut hī kam

mohabbateñ bhī rifāqateñ bhī adāvateñ aur nadāmateñ bhī
mirā asāsa maiñ jāntī thī kahāñ vafā thī kahāñ jafā thī

hai fareb-e-dil bhī shāyad vaj.h-e-takmīl-e-vafā
ārzū-e-dil bhī ham-rañg-e-hinā karnā paḌī

har vafā nā-āshnā se bhī vafā karnā paḌī
dil se dushman ke liye aksar duā karnā paḌī

bujh ga.ī rāh-e-vafā Duub ga.ī sub.h-e-umīd
le ke ab aa.egā kyā va.ada-e-dīdār koī

yā-ḳhudā rāh-e-vafā par rahbarī karnā merī
jab mujhe gumrāh merā ham-safar karne lage

hameñ to ādat-e-zaḳhm-e-safar hai kyā kahiye
yahāñ pe rāh-e-vafā muḳhtasar hai kyā kahiye

har har qadam pe saath huuñ saaya huuñ maiñ tirā
ai bevafā dikhā to zarā bhuul kar mujhe

har-dam ilāj-e-mehr-o-vafā DhūñDte raho
is tīrgī meñ ghar kā ujālā koī to ho

lahad pe aa.e the do phuul bhī chaḌhā jaate
abhī tak aap meñ bū-e-vafā nahīñ aatī

laboñ pe rahnā ki jab tak ummīd-e-āmad us kī hai mujh ko baaqī
kare na va.ada vafā agar vo to mujh se ai jaañ vafā na karnā

aa ke bachā le maut mujhe zindagī se tū
kitnī guzārūñ aur maiñ is bevafā ke saath

hazār va.ade kiye haiñ tum ne kabhī kisī ko vafā na karnā
chalo usī par jo ġhair kah deñ kahīñ hamārā kahā na karnā

vafā shart-e-ulfat hai lekin kahāñ tak
dil apnā bhī tujh sā huā chāhtā hai

hai to balā-e-zindagī rasm-e-vafā magar nahīñ
baat ye hai ki ḳhair se shar pe mirī nazar nahīñ

pur-ḳhatā sahī 'ja.afar' be-vafā sahī 'ja.afar'
ḳhair tum sahī haq par baat kyā baḌhānī hai

un ko bahut ġhurūr thā apnī jafāoñ par
ham bhī vahīñ aḌe rahe apnī vafā ke saath

is tarah rā.egāñ ga.ī 'nāzish' mirī vafā
jaise kisī faqīr ke dar par sadā lage