Tags-Wafa

mire dil ke shīshe ko bevafā tū ne TukḌe TukḌe hī kar diyā
mire paas to vahī ek thā yaañ dukān-e-shīsha-garāñ nahīñ

ai mire hausla-e-ġham hai yahī vaqt-e-vafā
zahr hī hāsil-e-sad-umr-e-tamannā na bane

pyaar meñ koī fasīleñ jo uThā.e bhī to kyā
tum to ḳhud lazzat-e-uslūb-e-vafā bhuul ga.e

haiñ vafā kī rāh-e-darāz meñ na.ī manzileñ na.e marhale
vo baneñge kyā mire ham-safar jo qadam qadam pe Thahar ga.e

vo jo qais ġharīb the un kā junūñ sabhī kahte haiñ ham se rahā hai fuzūñ
hameñ dekh ke hañs to diyā tum ne kabhī dekhe haiñ ahl-e-vafā tum ne

nazar na aa.e mujhe husn ke sivā kuchh bhī
vo bevafā bhī agar hai to bevafā na lage

har baat pe Thahrā ke mujhe morid-e-ilzām
īsār-o-vafā ko mire be-kār karo tum

kaisī hayā kahāñ kī vafā pās-e-ḳhalq kyā
haañ ye sahī ki aap ko aanā yahāñ na thā

mehr-o-vafā ḳhulūs-o-mohabbat gudāz dil
sab kuchh hai mere paas ki zinda huuñ maiñ abhī

koī nahīñ hamrāz-e-tamannā koī nahīñ dam-sāz-e-safar
rāh-e-vafā meñ tanhā tanhā chalne par majbūr hai chāñd

dāman uThā uThā ke jo bachtā huā chalā
kyuuñ hoveñ mar ke kūche meñ is bevafā ke ḳhaak

vo bevafā karegā mirī qadr kyā 'qalaq'
karte haiñ apne āshiqoñ kā paas aur log

nau-giraftār-e-mohabbat huuñ vafā mujh meñ kahāñ
kam se kam dil abhī sau baar to aane diije

kabhī thā dār-e-vafā kū-e-ishq aur ab hai
qimār-ḳhāna-e-sūd-o-ziyāñ ma.āz-allāh

dāġh-e-firāq zaḳhm-e-vafā ashk-e-ḳhūñ-fishāñ
roz-e-azal se haiñ yahī jāgīreñ ishq kī

kāñdhe pe uThā.e haiñ sitam rāh-e-vafā ke
shikva mujhe tum se hai ki do-gām na aa.e

āvārgī-e-dil bhī ga.ī qaid-e-vafā bhī
jis din se mohabbat ke salāsil meñ paḌe ho

khulne lage asrār-e-vafā dīda-o-dil par
jis din se ġham-e-hijr kī mushkil meñ paḌe ho

tārīk huī saarī duniyā kyā maut huī mujh bekas kī
kam aise hue haiñ shahīd-e-vafā ġham jin kā ik aalam ne kiyā

kyā aisī vafā par naaz karūñ jo baa.is ho rusvā.ī kī
ye baat huī mar jaane kī bad-nām kisī ko sitam ne kiyā