Tags-Wafa

'majrūh' likh rahe haiñ vo ahl-e-vafā kā naam
ham bhī khaḌe hue haiñ gunahgār kī tarah

kis daam uThā.eñge ḳharīdār ki is baar
bāzār meñ hai jins-e-vafā aur tarah kī

tabī.at kī mushkil-pasandī to dekho
hasīnoñ se tark-e-vafā chāhtā huuñ

rah-e-vafā meñ miTā de vo apnī hastī ko
jo chāhtā hai mirā hashr tak nishāñ bhī rahe

nādān ho jahāñ kā chalan dekhte nahīñ
rasm-e-jafā ko aam ba-nām-e-vafā karo

garche un se koī ummīd-e-vafā mujh ko nahīñ
jī bahal jaatā hai phir bhī nāma-bar ko dekh kar

chāhat kī intihā kabhī terī mirī vafā
ijrā kā mājrā kabhī kachchā ghaḌā huā

har dushman-e-vafā mujhe mahbūb ho gayā
jo mo.ajaza huā vo bahut ḳhuub ho gayā

sunā rahī haiñ vafā kī rāheñ shikast-e-parvāz kā fasāna
ki duur tak vādī-e-talab meñ paḌe haiñ har samt ḳhvāb TuuTe

jahāñ ga.e yahī dekhā ki log marte haiñ
yahī sunā ki vo va.ada vafā nahīñ karte

unhoñ ne kyā na kiyā aur kyā nahīñ karte
hazār kuchh ho magar ik vafā nahīñ karte

nāmūs-e-vafā kā paas rahā shikva bhī zabāñ tak lā na sake
andar se to ro.e TuuT ke ham par ek bhī ashk bahā na sake

pahle to navāzā gayā maiñ ḳhil.at-e-ġham se
phir shahriyat-e-mulk-e-vafā dī ga.ī mujh ko

is vāste ḳhāk-e-parvāna par sham.a bahātī hai aañsū
mumkin hai vafā ke qisse meñ us kā bhī kahīñ naam aa jaa.e

ġham-gusār-e-safar-e-rāh-e-vafā
mizha-e-ābla-pā hotī hai

ronā aatā hai hameñ bhī lekin
is meñ tauhīn-e-vafā hotī hai

ishq meñ sabr-o-razā darkār hai
fikr-e-asbāb-e-vafā darkār hai

vo paak havā apne ghar kī pyaar kī jilā apne ghar kī dil meñ samāyā ghar apnā
īsār-e-vafā apne ghar kā vo dard diyā apne ghar kī ruuh pe chhāyā ghar apnā

hai vafā dil meñ yā jafā kyā hai
saaf kahiye ki mājrā kyā hai

vafā mirī mo'tabar hai kitnī jafā vo kar sakte haiñ kahāñ tak
jo vo mujhe aazmā rahe haiñ to maiñ unheñ aazmā rahā huuñ