Tags-Wafa

mirī vafā hai mire muñh pe haath rakkhe hue
tū sochtā hai ki kuchh bhī nahīñ samajhtā maiñ

tū jān-e-mohabbat hai magar terī taraf bhī
ik ḳhvāhish-e-tash.hīr-e-vafā le ga.ī ham ko

sitam hai ab bhī umīd-e-vafā pe jiitā hai
vo kam-nasīb ki shā.ista-e-jafā bhī nahīñ

pareshāñ maiñ nahīñ lekin jafā par tum pashemāñ ho
vafā par merī is se baḌh ke aur ilzām kyā hogā

o vafā-nā-āshnā kab tak sunūñ terā gila
be-vafā kahte haiñ tujh ko aur sharmātā huuñ maiñ

ye ġharīb 'ājiz'-e-be-vatan ye ġhubār-e-ḳhātir-e-anjuman
ye ḳharāb jis ke liye huā usī bevafā ne bhulā diyā

go sitam ne tere har ik tarah mujhe nā-umīd banā diyā
ye mirī vafā kā kamāl hai ki nibāh kar ke dikhā diyā

shauq chaḌhtī dhuup jaatā vaqt ghaTtī chhāñv hai
bā-vafā jo aaj haiñ kal be-vafā ho jā.eñge

kuchh mile yā na mile apnī vafāoñ kā sila
dāman-e-rasm-e-vafā apnā baḌhāte chaliye

qurb ke na vafā ke hote haiñ
jhagḌe saare anā ke hote haiñ

jo us ne zid kī to aafat aa.ī duhā.ī dene lagī ḳhudā.ī
qayāmat us bevafā ne Dhaa.ī idhar kī duniyā 'sharaf' udhar kī

hāsil-e-umr-e-vafā hai bas ik ehsās-e-yaqīñ
vo bhī parvarda-e-āġhosh-e-gumāñ ho jaise

ye sikhāyā hai dostī ne hameñ
dost ban kar kabhī vafā na karo

ab to kahte ho vafā ham se karoge lekin
vaqt aane pe kahīñ jaa.e na sarkār badal

kaun vafā kī manzil se is shaan se guzrā
chāk-e-qabā dekhe jo koī balā se dekhe

terī jafā to morid-e-ilzām thī na hai
merī vafā bhī koshish-e-takmīl-e-zāt thī

gar tujh meñ hai vafā to jafākār kaun hai
dildār tū huā to dil-āzār kaun hai

ahl-e-vafā se tark-e-ta.alluq kar lo par ik baat kaheñ
kal tum in ko yaad karoge kal tum inheñ pukāroge

bhātīñ nahīñ kuchh us ke nikaltī hai apnī jaan
kyā aise bevafā se vafā aadmī kare