Tags-Wafa

talḳhī-e-ġham mire ehsās kā sarmāyā hai
husn se maiñ ne ye in.ām-e-vafā paayā hai

ham to ḳhair un ko bhūlte the kahāñ
va.ade lekin vafā ke bhuul ga.e

agar vo bevafā zid chhoḌ de aur Thiik ho jaa.e
to shāyad phir mire ghar-bār kī sūrat nikal aa.e

vo nīchī nazreñ thiiñ dil kī tālib vafā ne go jaan nazr kar dī
magar asar jo savāl meñ thā javāb meñ vo asar nahīñ hai

haram se nikle talāsh-e-but meñ butoñ se yād-e-ḳhudā pe bigḌī
ġharaz ham āvāra-e-vafā haiñ kahīñ hamārā guzar nahīñ hai

kuchh to le kaam taġhāful se vafā ke paikar
ye tirā pyaar kahīñ maar na Daale mujh ko

bā-vafā ek dūsre se miyāñ
har-nafas bevafā.ī karte haiñ

badaltī dekhīñ vafādāriyāñ bhī vaqt ke saath
vafā jahāñ ke liye ek kārobār rahī

pareshāñ hai vo jhūTā ishq kar ke
vafā karne kī naubat aa ga.ī hai

mirī vafā hai mire muñh pe haath rakkhe hue
tū sochtā hai ki kuchh bhī nahīñ samajhtā maiñ

ḳhud apnī zaat pe to e'timād puḳhta huā
'nadīm' yuuñ to mujhe kyā milā vafā kar ke

har ghaḌī ashk-fishāñ haiñ āñkheñ
yahī anjām-e-vafā hai shāyad

ḳhūb-rū jitne haiñ aalam meñ jafākār haiñ sab
yaad kyā jāneñ unheñ taur-e-vafā hai ki nahīñ

ek muddat huī ham ne duniyā kī har ek zid chhoḌ dī
ek muddat huī ham ne dil ko vafā ke havāle kiyā

itnā pās-e-vafā to hai us ko
bevafā.ī se be-vafā na huā

pūchhtā kaun vafā se us kī
mar ga.e log balā se us kī

ham se na hogī tark-e-vafā ye aur kisī ko sunā.eñ aap
ham na suneñge hazrat-e-nāseh laakh hameñ samjhā.eñ aap

āḳhir tire sulūk ne jhuTlā diyā ise
ik zo.am thā hamīñ ki sarāpā vafā haiñ ham

vafā pe aañch na aatī agar tumhī kahte
zabāñ tak aaj jo ik baat chal ke aa.ī hai

ġham meñ ḳhush rahte haiñ har sāya-e-qurbat se duur
ab badal Daalā mizāj ahl-e-vafā kā ham ne