Tags-Wafa

phir bevafā ko bahr-e-mohabbat samajh liyā
phir dil kī naav Duub ga.ī hai sarāb meñ

tum se mansūb hai ik ahd-e-vafā kā iqrār
tum bhī tauhīn-e-vafā karte ho kyā karte ho

vafā kī shaan vo lekin kabhī mire na hue
hai merī jaan vo lekin kabhī mire na hue

haa.e vo rabt-o-zabt-e-mohabbat haa.e ye pās-e-shart-e-vafā
aaj na milne par bhī ḳhush haiñ kal mil kar pachhtā.e the

maiñ vafā kā saudāgar
luT ke dasht-o-sahrā se

vafā kī is se talab kar na hargiz ai nādāñ
ki bevafā hai tilism-e-jahān-e-fānī aap

ye bevafā bhī miyāñ-'mus.hafī' kisī ke hue
butoñ pe karte ho kyuuñ itnī jāñ-fishānī aap

kis qaht-e-etibār se guzre haiñ ahl-e-dil
rañg-e-vafā bhī uḌ gayā rañg-e-hinā ke saath

maiñ huuñ vafā-shi.ār yahāñ jī ke kyā karūñ
ye daur-e-bevafā hai mujhe maar dījiye

vafā-dārī ba-shart-e-ustuvārī asl īmāñ hai
mare but-ḳhāne meñ to ka.abe meñ gaaḌo barahman ko

ulfat meñ barābar hai vafā ho ki jafā ho
har baat meñ lazzat hai agar dil meñ mazā ho

qāsid us bevafā se yuuñ kahnā
likh tū kuchh bhej gar nahīñ aatā

ahd-e-vafā se kis liye ḳhā.if ho merī jaan
kar lo ki tum ne ahd nibhānā to hai nahīñ

kyuuñ ye miltī hai be-vafāoñ se
kaash laḌtī vafā-shi.ār se aañkh

judā.iyoñ se shikāyat to ho bhī jaatī hai
rifāqatoñ se vafā meñ kamī nahīñ aatī

maiñ tujh se duur sahī lekin ai rafīq mire
tirī vafā ko mirī jehd-e-mustaqil kā salām

ḳhabar nahīñ ki nigār-e-sahar kī hasrat meñ
tamām raat charāġh-e-vafā pe kyā guzrī

maal agar le ke sabhī aa.e tirī mahfil meñ
mire āñchal meñ vafā thī maiñ vafā le ke chalī

kitnī ma.asūm hai vafā apnī
bevafā.ī hañsī uḌātī hai

rah-e-vafā kī rivāyat hai sar jhukā rakhnā
bisāt-e-ishq pe ye maat thoḌī hotī hai