Tags-Wafa

tark karnī thī har ik rasm-e-jahāñ
haañ magar rasm-e-vafā rakhnī hī thī

tum ko aate haiñ sab jafā-o-jaur
ik vafā hī magar nahīñ aatī

akelī maiñ hī nahīñ huuñ vafā ke zindāñ meñ
bahut se aur haiñ is qaid-e-rā.egānī meñ

ye kahīñ umr-e-guzishta to nahīñ tum to nahīñ
koī phirtā hai sar-e-shahr-e-vafā āvāra

chup-chāp sulagtā hai diyā tum bhī to dekho
kis dard ko kahte haiñ vafā tum bhī to dekho

apnī ġhalat vafā kī talāfī karūñgā maiñ
vo aur hoñge jin ko vafāoñ pe naaz hai

vo bevafā hai to is kā bhī ġham bahut hai magar
maiñ bā-vafā huuñ to is kā bhī hai malāl mujhe

ġhair kā da.ava-e-vafā kizb kī intihā nahīñ
aa ke sunā.ī dāstāñ ek sire se sab ġhalat

āh-o-nāla hī sahī ahl-e-vafā kā maslak
ik maqām aur bhī aatā hai fuġhāñ se aage

ḳhayāl hijr-e-musalsal meñ aa.e haiñ kyā kyā
mirī vafā ke qadam Dagmagā.e haiñ kyā kyā

kisī be-vafā kā gila bhī hai kisī bā-vafā kī talāsh hai
ye fareb-e-shauq ki dil ko phir kisī āshnā kī talāsh hai

dil-e-nā-subūr ko phir vahī but-e-bevafā kī talāsh hai
ġham-e-ibtidā to uThā chukā ġham-e-intihā kī talāsh hai

ye vo jins hai ki jahān meñ jo na bik sake jo na mil sake
tujhe kyuuñ vafā kā junūn hai tujhe kyuuñ vafā kī talāsh hai

zarā dekh aa.ina merī vafā kā
ki tū kaisā thā ab kaisā lage hai

tane se Tek lagā.e manāte shām-e-vafā
to raat raat meñ saarā daraḳht phal jaatā

maiñ kyuuñ zabāñ se vafā kā yaqīñ dilā.ūñ tumheñ
tum āzmāo mujhe aur maiñ āzmā.ūñ tumheñ

sharh-e-jāñ-sozī-e-ġham-e-arz-e-vafā kyā karte
tum bhī ik jhūTī tasallī ke sivā kyā karte

tum bevafā hue to zamāna milā tumheñ
ham bā-vafā hue to nayā āriza milā

ham ki tajdīd-e-ahd-e-vafā kar chale ābrū-e-junūñ kuchh sivā kar chale
ḳhud to jaise kaTī zindagī kaaT lī haañ na.e daur kī ibtidā kar chale

phir bevafā ko bahr-e-mohabbat samajh liyā
phir dil kī naav Duub ga.ī hai sarāb meñ