Tags-Wafa

vafā hai jurm to iqrār-e-jurm hai mujh ko
ye maiñ huuñ ye mirā dil lījiye sazā diije

ahd-e-vafā par marne vaalo
mat karnā ye kaam burā hai

maiñ to vo insān huuñ jis kī vafā se hai ġharaz
ba.az logoñ ko magar dād-e-vafā bhī chāhiye

vafā kareñge agar ham vafā milegī hameñ
'farāz' pahle-pahal ham bhī is gumān meñ the

bañdhe shart-e-vafā kyūñkar nibhe rasm-e-vafā kyūñkar
yahāñ kuchh aur hai dil meñ vahāñ kuchh aur hai dil meñ

hai baare e'timād-e-vafā-dārī is qadar
'ġhālib' ham is meñ ḳhush haiñ ki nā-mehrbān hai

vahī ḳhūbī vahī iḳhlās-o-muravvat ke nishāñ
Hyderabad ki ik shahr-e-vafā ho jaise

kaise qātil haiñ jinheñ pās-e-vafā hai na jafā
qatl karte haiñ to aġhyār kī talvāroñ se

āzmā.ish thī kaḌī kū-e-vafā meñ ki jahāñ
kaj-kulah aa.e subuk-sar ga.e ḳhāmoshī se

vo bevafā bhī hai maġhrūr bhī hai patthar bhī
use tarāshne baiThūñ to chheniyāñ uḌ jaa.eñ

sunā hai hameñ bevafā tum kaho ho
zarā ham se āñkheñ milā lo to jāneñ

musāfirat ne pukārā na.e ufuq kī taraf
agar vafā kī sharī.at kā ye sila hogā

aisī duniyā meñ junūñ aise zamāne meñ vafā
is tarah ḳhud ko tamāshā na banā maan bhī jā

jasta jasta paḌh liyā karnā mazāmīn-e-vafā
par kitāb-e-ishq kā har baab mat dekhā karo

maiñ zaḳhm zaḳhm ho gayā lahū vafā ko ro gayā
laḌā.ī chhiḌ ga.ī to mujh ko Dhaal kar diyā gayā

tumhārī bazm se jaatā hai nā-murād koī
safar-ba-ḳhair kī jān-e-vafā duā de do

maiñ to mashkūk nahīñ us kī vafā se 'ja.afar'
ek mauhūm ishāre meñ bhī haañ ho ki na ho

vafā ke raaz se parda nahīñ uThā.ūñgī
maiñ dil ke zaḳhm tah-e-dil se hī chhupā.ūñgī

vo barham hoñge duniyā jaan legī raaz ulfat kā
vafā par harf aa jā.egā do aañsū bahāne meñ

ye apnī vafā kā aalam hai ab un kī jafā ko kyā kahiye
ik nishtar zahr-āgīñ rakh kar nazdīk-e-rag-e-jāñ bhuul ga.e