Tags-Wafa

vo jo fard-e-vafā meñ qalam-zad hue
naam un meñ numāyāñ hamārā bhī hai

zaḳhm ba-jāñ hai ḳhaak basar hai chaak ba-dāmāñ hai 'unvāñ'
bazm-e-jahāñ meñ raqs-e-vafā par milte haiñ in.aam bahut

dil diyā jī diyā ḳhafā na kiyā
bevafā tujh se se maiñ ne kyā na kiyā

kiyā savāl jo maiñ ne vafā ke qātil se
zabāñ pe qufl lagā thā javāb kyā detā

ai kārvān-e-ishq-o-vafā ke musāfiro
kahnā mirā salām bhī manzil jahāñ mile

bāham ā.īn-e-vafā rasm-e-mohabbat kaisī
vaqt ab vo hai ki bandoñ ko ḳhudā yaad nahīñ

sar-e-turbat vo ḳhamoshī pe mirī kahte haiñ
marne vaale tujhe paimān-e-vafā yaad nahīñ

dil ne vafā ke naam par kār-e-vafā nahīñ kiyā
ḳhud ko halāk kar liyā ḳhud ko fidā nahīñ kiyā

jo apne yaar ke jaur-o-jafā meñ haiñ masrūr
unheñ phir aur ke mehr-o-vafā se kyā matlab

bahr-e-duniyā ke talātum meñ ḳhulūs aur vafā
kachchī miTTī ke gharauñde haiñ banā kar dekho

vafā ke daaġh ko dil se miTā nahīñ saktā
ye vo charāġh hai tūfāñ bujhā nahīñ saktā

vafā kī dāstāñ duniyā meñ 'kaifī' kab nahīñ chhiḌtī
zabān-e-ḳhalq par kab merā afsāna nahīñ aatā

kār-e-ahl-e-vafā jehd-o-taslīm hai ham bhī taslīm meñ kyā ta.ammul kareñ
zaat ke dasht kitne hī darpesh haiñ kyā kareñge agar phir tasāhul kareñ

aaj Thahrā hai mirā harf-e-vafā qābil-e-dār
kal tū hī merī vafāoñ ko tarastā hogā

mohabbateñ to milīñ go vafā milī na milī
safar hasīn thā manzil kā kyā milī na milī

talḳhiyāñ rah jā.eñgī lafz-e-vafā rah jā.egā
darmiyāñ iḳhlās ke phir ik ḳhalā rah jā.egā

rañg bharte haiñ vafā kā jo tasavvur meñ tire
tujh se achchhī tirī tasvīr banā lete haiñ

tohmatoñ se hameñ degā ye jahāñ dād-e-vafā
ab isī Dhañg se tauqīr hamārī hogī

lutf-e-vafā nahīñ ki vo bedād-gar nahīñ
ḳhāmosh huuñ ki merī fuġhāñ be-asar nahīñ

zamāne kī nigāhoñ meñ gunahgār-e-vafā ham haiñ
na jaane kyuuñ nahīñ hotā hamārā faisla koī