Tags-Wafa

vafā ke baare meñ logoñ kī raa.e Thiik nahīñ
briādrī se ye ḳhātūn hai nikālī huī

ḳhudā kā shukr adā kar vo bevafā niklā
ḳhushī manā ki tirī jaan kī bahālī huī

jafā vaale hisāb is kā lagā leñ
vafā kartā huuñ maiñ din raat kitnī

kam jo Thahre jafā se merī vafā
to ye pasañg hai tarāzū kā

aah mat pūchh sitamgār ki tujh se thī hameñ
chashm-e-lutf-o-karam-o-mahr-o-vafā kyā kyā kuchh

sitam hai zulm hai un kī taraf se
mohabbat hai vafā hai aur maiñ huuñ

vo kahte haiñ har choT par muskurāo
vafā yaad rakkho sitam bhuul jaao

jafā kī jaan ko sab ro rahe haiñ
mujhe un kī vafā ne maar Daalā

tark-e-ta.alluqāt kā kuchh un ko ġham nahīñ
ham to shikast-e-ahd-e-vafā se malūl haiñ

ik shaḳhs kar rahā hai abhī tak vafā kā zikr
kaash us zabāñ-darāz kā muñh noch le koī

tire daur-daura-e-ishq meñ mirī ek rañg se kaT ga.ī
na sitam huā na karam huā na jafā huī na vafā huī

na jaane kis kis se dil lagā kar vafā se māyūs ho chukā huuñ
nazar pareshān-e-shash-jihat hai koī bhī dard-āshnā nahīñ hai

ajab nahīñ zahmat-e-vafā se mujhe kisī din najāt de de
yahī mirī be-zabāñ mohabbat jo dar-ḳhur-e-e'tinā nahīñ hai

ye roz-e-tajdīd-e-ahd-e-ulfat ye roz paimān-e-dil-navāzī
hazār taslīm kar rahā huuñ magar yaqīn-e-vafā nahīñ hai

jatā ke majbūrī-e-mohabbat umīd-e-mehr-o-vafā ke ma.anī
maiñ ḳhud huuñ apnā sukūn-e-dushman kisī kī koī ḳhatā nahīñ hai

vafā meñ barābar jise tol leñge
use saltanat bech kar mol leñge

sabhī ke chehroñ pe mehr-o-vafā kā ġhāza hai
kahūñ ye kaise parāyā hai kaun apnā

paañv chhalnī to vafā ghā.il thī
jaane us moḌ pe kyā yaad aayā

ḳhāka-e-ulfat meñ ḳhuuñ bharnā thā ham ne bhar diyā
log ham ko bā-vafā yā be-vafā samjhā kareñ

is se pahle ki hameñ ahl-e-jafā rusvā kareñ
apnī jaañ de kar vafā karne kā ham va.ada kareñ